– Не сакрэт, што часцей за ўсё ў нас заахвочваюцца земляробы, механізатары, камбайнеры, якія заняты на пасяўной, жніве, нарыхтоўцы кармоў, – адзначыла старшыня райкама прафсаюза работнікаў аграпрамысловага комплексу Валянціна Козел. – Таму і было вырашана якраз у зімовы час заахвочваць лепшых работнікаў жывёлагадоўчай галіны. Акцыя праводзіцца ў чацвёрты раз. Разам з прафсаюзнымі актывістамі, ідэалагічнымі работнікамі мы наведаем усе 36 малочнатаварных ферм і комплексаў раёна, ушануем перадавікоў вытворчасці, пракантралюем стан умоў работы работнікаў жывёлагадоўлі, пацікавімся іх справамі.

І вось у панядзелак з самай раніцы Валянціна Козел, начальнік аддзела ідэалагічнай работы, культуры і па справах моладзі райвыканкама Ірына Шаблоўская і старшыня прафкама ААТ «Кляновічы» Надзея Заблоцкая наведалі ўсе аб’екты жывёлагадоўлі гэтай сельгасарганізацыі.

Першай на шляху была малочнатаварная ферма «Калодніца». Завітаўшы ў пакой адпачынку, дзе сабраўся калектыў, старшыня райкама прафсаюза работнікаў АПК расказала пра акцыю «Наш жывёлавод», падзякавала ўсім за нялёгкую, але такую патрэбную працу, пажадала моцнага здароўя, новых поспехаў і здзяйсненняў усяго намечанага. Загадчык фермы Аляксандр Веялка знахо­дзіцца ў водпуску, і падарунак быў уручаны ветэрынарнаму ўрачу Вандзе Івановай, якая выконвае абавязкі загадчыка фермы.

Цёплая сустрэча адбылася і на малочнатаварнай ферме «Кіявец», якой загадвае Таццяна Чайкіна. Тут таксама пасля ўшанавання жывёлавода Марыі Падонскай вялася размова аб працоўных буднях, аб планах на бягучы год, аб людзях, якія аддалі гэтай справе не адзін дзясятак гадоў.

Добры настрой  быў і ў калектыве малочнатаварнага комплексу «Стары Бобр». Начальнік комплексу Лілія Цяльпук адзначыла, што пад яе кіраўніцтвам працу­юць 37 чалавек. І ўсе стараюцца, каб былі высокія валавыя надоі, каб прадукцыя рэалізоўвалася гатункам «экстра», каб было стопрацэнтным захаванне маладняку. А пасля размоў Валянціна Козел, уручаючы падарункі, пажадала кожнаму гэтак жа добрасумленна і шчыра працаваць і надалей, трымаць высокую планку па надоях.

Нотку радаснага настрою ўнеслі госці і ў дружны калектыў жывёлаводаў малочнатаварнай фермы «Новы Бобр». А ў тым, што ён сапраўды з’яднаны, нам прыходзілася пераконвацца ўжо неаднаразова. Гэта ж сцвярджае і старшыня прафкама гаспадаркі Надзея Заблоцкая: поспех аднаго чалавека – гэта перамога ўсёй каманды жывёлаводаў, якія працуюць на ферме. І пад дружныя апладысменты Валянціна Козел уручыла падарункі загадчыцы фермы Ларысе Гірс і жывёлаводу Аляксандру Масурноўскаму.

Аб тым, што ў раёне прахо­дзіць акцыя «Наш жывёлавод», жывёлаводам малочнатаварнага комплексу «Бобр» нагадалі прафсаюзныя лідары Валянціна Козел і Надзея Заблоцкая. І зноў пасля выказаных шчырых слоў у адрас лепшых, выслуханых меркаваннях аб працоўных здабытках і ўмовах працы, адбылося ўшанаванне – падарунак атрымала начальнік комплексу Святлана Калініна.

– Усе мы пераканаліся ў тым, што ўшанаванне лепшых жывёлаводаў узнімае настрой людзям, якія, без перабольшання, працуюць ад світання да світання, – сказала напрыканцы Валянціна Козел. – А добрае слова, ацэнка працы, матэрыяльная падтрымка стымулююць і надалей быць на вышыні.

Фота Аляксандра БУДЗЬКО.