Сімвалічна, што свята прыпадае на тую пару, калі абуджаецца вясна. Нашы сэрцы напаўняюцца радасцю, гармоніяй і спакоем.

Усе прыгатаванні завершаны, у хатах і кватэрах стаіць водар духмяных булак, пафарбаваныя яйкі – адна з галоўных велікодных традыцый.

Напярэдадні Вялікадня ў творчых майстэрнях рукамі дзяцей і дарослых ствараліся вырабы, карціны, прысвечаныя святу. У адну з іх мы завіталі. У аб’яднанні па інтарэсах «Кропелька» Крупскага ЦДТ панавала па-сапраўднаму святочная атмасфера. У паветры вітаў пах фарбаў, выхаванцы натхнёна малявалі.

– За столькі гадоў заўважыла, што дзеці з задавальненнем працуюць над стварэннем велікодных матываў, – кажа педагог дадатковай адукацыі Валянціна Вішнякова. – Яны ведаюць пра свята, разумеюць яго сэнс, многія наведваюць разам з бацькамі храмы і Богаслужэнні. Сваё натхненне яны ўвасабляюць ў творчасці, раскрываюць шматграннасць і прыгажосць свята, яго культурныя традыцыі ў нацюрмортах, кампазіцыях. Ёсць і сямейныя работы. А дзяўчаты, не адрываючыся ад творчага працэсу, расказваюць:

– На Вялікдзень усе людзі вітаюць адзін аднаго словамі «Хрыстос уваскрос!». У адказ мы кажам: «Сапраўды ўваскрос!» Так людзі дзеляцца радасцю ад гэтай падзеі.

– Сімвалам свята з’яўляюцца пафарбаваныя яйкі – у знак таго, што самае найвялікшае цуда адбылося на свеце. А яшчэ на свята пякуць  кулічы.

– У храмах праходзяць Богаслужэнні, асвяшчаюцца яйкі. Родныя і блізкія сустракаюцца, хросныя ўручаюць сваім хрэснікам падарункі.

Святочнымі днямі праходзіць абласны этап рэспубліканскага конкурса выяўленчага мастацтва «Свята святаў». Выхаванцы Цэнтра дзіцячай творчасці таксама рыхтуюцца прымаць удзел.

 – Такія конкурсы дазваляюць захоўваць і развіваць хрысціянскія традыцыі народа, – пацвярджае Валянціна Вішнякова. – І мы, безу­моўна, удзельнічаем. Рыхтуем работы, якія будуць прадстаўлены ў Нацыянальным цэнтры мастацкай творчасці дзяцей і моладзі. Малюем на вялікіх фарматах паперы А3 гуашшу і акварэллю. Выкарыстоўваем і нетрадыцыйныя тэхнікі выканання – тычкаванне, малюнак па-мокраму. Дарэчы, усё новае дзецьмі ўспрымаецца з вялікай ахвотай.