Юная крупчанка збіраецца паступаць у Беларускі дзяржаўны эканамічны ўніверсітэт на спецыяльнасць менеджмент сацыяльна-адміністратыўны.

– Калі даведалася вынікі ЦТ па матэматыцы і замежнай мове, з’явілася альтэрнатыва –  Акадэмія кіравання пры Прэзідэнце Рэспублікі Беларусь, спецыяльнасць дзяржаўнае кіраванне і эканоміка, – распавядае Віялета.  – Як здаць ЦТ на 100 балаў? Вучыць, вучыць і вучыць – па-іншаму ніяк! З выбарам спецыяльнасці я вызначылася ў 10 класе. А вось пра тое, што пры паступленні буду здаваць беларускую мову, ведала ўжо ў 6 класе. Чаму менавіта беларускую мову? А як жа інакш?! Лічу, што кожны паспяховы малады чалавек павінен валодаць роднай мовай. Да таго ж, напэўна, сваё ўзяла і генетыка – у мяне мама працуе настаўнікам беларускай мовы і літаратуры ў сярэдняй школе № 1 горада Крупкі.

Пачалося планамернае і мэтанакіраванае вывучэнне тонкасцяў і нюансаў беларускай мовы.

– Дапамагала мама, – гаворыць Віялета. – Дадаткова займалася са сваім педагогам Таццянай Раманаўнай Жукавай. Пастаянна ўдзельнічала ў алімпіядзе па беларускай мове і літаратуры. Праўда, так і не ўдалося пераадолець планку раённага ўзроўню. У 10 класе пачала ўзмоцнена рыхтавацца да ЦТ. Цяжка? Не, калі ўвесь час вучыш. У мінулым годзе на апошнім этапе рэпетыцыйнага тэсціравання па гэтым прадмеце набрала крыху больш за 60 балаў. Вынікам, у прынцыпе, засталася задаволеная – наперадзе яшчэ цэлы год! 94 – мой апошні бал. Педагогі ў адзін голас запэўнівалі: «Віялета, ты можаш выйсці на максімум!» Скажу шчыра, я на такі вынік не разлічвала.

На ЦТ Віялета адчувала сябе спакойна:

– Але не без хвалявання. Трохі напружвала сама атмасфера: поўная цішыня ў аўдыторыі, пастаянная думка, што галоўнае – правільна запоўніць бланк адказаў. Разумела: цяпер усё залежыць толькі ад мяне! Сабралася з думкамі, сістэматызавала ўсе свае веды. З тэстам справілася задоўга да адведзенага часу. З аўдыторыі выйшла ўпэўненай – ніводнае заданне не выклікала ніякога сумнення.

Напружанне ад чакання вынікаў першага ЦТ часткова перабівалі выпрабаванні па іншых вучэбных прадметах.

– Смс-паведамленне я не падключала, – працягвае Віялета.– Пра вынікі даведалася онлайн на сайце Рэспубліканскага інстытута кантролю ведаў. Увяла свае дадзеныя – бачу: 100 балаў. Адразу і не паверыла сваім вачам. Яшчэ некалькі разоў запар уводзіла дадзеныя – вынік той жа! Пабегла да мамы – у яе таксама шок. А я крычу ад моцных эмоцый. Ды так гучна, што маленькі брацік спалохаўся і захныкаў. Потым патэлефанавала бабулі, педагогам, з аднакласнікамі пагутарылі.

Гэты год выдаўся для Віялеты напружаным. Падрыхтоўка да выпускных экзаменаў і ўступных іспытаў, доўгае лячэнне ад двухбаковай пнеўманіі, актыўны ўдзел у школьным жыцці не перашкодзілі атрымаць высокія ацэнкі па вучэбных прадметах. У атэстаце толькі адна васьмёрка па матэматыцы, якую цалкам кампенсаваў вынік на ЦТ – 87 балаў.

– Як усё паспявала? – усміхаецца Віялета. – Я і сама не ведаю, як так атрымлівалася. Лад жыцця ў мяне такі. І мне падабаецца, калі няма вольнага часу, калі кожная хвіліна распісана. Вось зараз канікулы – і мне ўжо сумна, не хапае, скажам так, рытму. Пагрузілася ў класіку беларускай літаратуры – з цікавасцю перачытваю Івана Шамякіна, Васіля Быкава. Іграю на фартэпіяна – пад прыемныя і чароўныя гукі музыкі я адпачываю. У свой час на выдатна скончыла музычную школу па класе харавые спевы. З ранняга дзяцінства марыла стаць спявачкай, і цяпер спяваю. З узростам прыярытэты мяняліся. Былі думкі стаць педагогам ...

У сваім выбары Віялета Кошалева ўпэўнена на ўсе 100! Будучым абітурыентам жадае не здавацца, верыць ў сябе і смела ісці наперад. Выбраць для сябе пэўную мэту і імкнуцца да яе дасягнення, нягледзячы на складанасці.

Заўтра пачынаецца падача дакументаў у ВНУ Беларусі. Пажадаем Віялеце Кошалевай і ўсім крупчанам-абітурыентам поспехаў! Няхай вашыя мары спраўдзяцца!