Яго змаглі паглядзець жыхары розных куткоў краіны. У складзе дэлегацыі Міншчыны – крупчане. У фае Дварца Рэспублікі працавалі тэматычныя пляцоўкі, якія пераносілі гасцей у тыя страшныя часы. Праекты «Лёсы, складзеныя ў трохкутнік»,
«Подзвігі і лёсы партызан у дакументах», «Хлеб – нябачная сіла Перамогі», «За дзень наступны ўсяе зямлі» і іншыя. Атмасфера яскрава дапамагала адчуць горыч, боль і пакуты нашага народа.
З вітальным словам звярнуўся старшыня Мінскага аблвыканкама Аляксей Кушнарэнка:
– Хутка мы адзначым 80-ю гадавіну вялікай Перамогі. Ужо даўно на Міншчыне праходзіць шэраг мерапрыемстваў, прысвечаных гэтай падзеі. Вялікая Айчынная вайна спалучана з боллю і стратамі. Канцэрт-рэквіем «Кожны трэці» – жывы водгук на мужнасць мільёнаў людзей. Кожны год мы адкрываем новыя трагічныя старонкі гісторыі вайны. Наш свяшчэнны абавязак – захаваць памяць. Мір – гэта самае дарагое, што ёсць у беларусаў. Мы павінны быць годнымі нашчадкамі, працаваць з максімальнай самааддачай, каб наша родная Беларусь развівалася і квітнела.
Увазе гледачоў былі прадстаўлены страчаныя падчас вайны населеныя пункты нашай краіны, Героі Савецкага Саюза, якія нарадзіліся ці загінулі на тэрыторыі Беларусі, кадры хронікі, фотадакументы часоў вайны і пасляваенных гадоў. Лейтматыў другой часткі канцэрта – адказнасць сучаснікаў за захаванне гістарычнай памяці. Гучалі песні мінулых гадоў і сучасных аўтараў. Усе кампазіцыі пранізаны болем і сумам. Зал слухаў стоячы.
У душы кожнага прысутнага канцэрт-рэквіем пакінуў незабыўныя ўражанні і самыя моцныя эмоцыі. Крупчане падзяліліся свімі водгукамі.
Марына ХАРЛАМАВА, намеснік начальніка аддзела ідэалагічнай работы, культуры і па справах моладзі райвыканкама:
– Вялікай цаной быў заваяваны мір на зямлі. Толькі моцны духам народ можа быць пераможцам. І нам пра гэта не забыць ніколі. Канцэрт прайшоў са слязьмі на вачах. У кожнай песні – мужнасць і гераізм нашага народа.
Таццяна ЦІХАНОВІЧ, вядучы спецыяліст раённай арганізацыі РГА «Белая Русь»:
– Да пачатку канцэрта мы наведалі выставачныя кампазіцыі, на момант адчулі, што давялося перажыць нашым дзедам і прадзедам. Нават страшна ўявіць. Нам засталася светлая памяць. І пакуль мы помнім, героі жывыя.
Анастасія МЕЛЬНІК, урач-псіхіатр-нарколаг Крупскай ЦРБ, малады спецыяліст:
– Вельмі ўразілі словы адной з песень «Что может быть страшнее на земле, когда безвинно погибают дети»… На шчасце, мы ведаем пра вайну толькі з урокаў гісторыі, літаратуры, кіно. Над намі мірнае неба. Перад моладдзю адкрыты ўсе дарогі. Памятаць мы павінны і берагчы мір і спакой на зямлі.
Тамара ПАПОВА, Ала СЛІБОРСКАЯ, Валянціна ЗАКІРАВА, ветэраны працы:
– Вайна не абмінула ні адну беларускую сям’ю, у тым ліку і нашы. Мы раслі сярод сведкаў тых падзей. Падчас канцэрта пачуцці болю і гонару былі адначасова. Боль за тое, якія выпрабаванні прайшлі нашы бацькі і дзеды. А гонар – за тое, што жывём мы ў незалежнай краіне. Хай заўсёды будзе мір на зямлі!
Валерыя БОРЦІЧ, вядучы эканаміст упраўлення па сельскай гаспадарцы і харчаванні райвыканкама:
– Бясспрэчна, нялёгка было слухаць і глядзець, якія нечалавечыя пакуты выпалі вязням канцлагераў, колькі населеных пунктаў былі надзелены лёсам Хатыні. Але народ наш адолеў усе выпрабаванні. Для моладзі – гэта прыклад. У гонар памяці схіляем галовы.
Зінаіда МІГАЛЬ, настаўнік хіміі і біялогіі Бобрскай СШ:
– Дзень Перамогі – гэта вялікае свята, адначасова радаснае і сумнае. З кожным годам усё менш становіцца сведкаў. І тым мацнее наша памяць, якую мы перадаем падрастаючаму пакаленню. Упэўнена, што канцэрт ускалыхнуў самыя глубінныя пачуцці ў кожнага.
Дар’я МАРДАС, галоўны спецыяліст аддзела эканомікі райвыканкама:
– Вайна – гэта заўсёды страшна. Моладзь павінна бываць на падобных імпрэзах, каб больш ніколі не паўтарылася такая жудасная падзея. А галоўнае – цаніць і берагчы мір на роднай зямлі.
