На гэты раз на сустрэчу з насельніцтвам, якая праходзіла ў вёсцы Зароўе, прыехалі ўпраўляючы справамі райвыканкама Валянціна Сенцова і загадчык юрыдычнага сектара райвыканкама Кацярына Каласоўская. На вызначаным месцы – ля дома № 27 – чакалі старшыня Крупскага сельвыканкама Сяргей Хацкевіч і вяскоўцы.Адразу адзначым, што гэты населены пункт размешчаны непадалёку ад Крупак і да яго належныя пад’язныя шляхі, зручна дабірацца на работу. У вёсцы пражываюць 43 чалавекі, з якіх 23 працаздольныя. Ды і надта вялікіх праблем у жыхароў не існуе. Вёска, як кажуць, жыве сваімі клопатамі. Аўталаўка прыязджае тры разы на тыдзень, што поўнасцю задавальняе тых, хто падыходзіць да яе. У любы час можна звярнуцца да сацыяльнага работніка Валянціны Туманскай, якая трымае цесную сувязь з кіраўніцтвам Крупскага сельвыканкама.
Вольга Каваленка звярнулася з просьбай замяніць лямпачку на ліхтары, што ля дома № 63, і адрэгуляваць уключэнне электрасвятла. Дзмітрый Барысаў спытаў, ці ёсць магчымасць засыпаць пяском лужу ля дома № 27 і прайгрэйдзіраваць вясковую вуліцу. Гаварылі жыхары Зароўя аб няправільнай нумарацыі дамоў, з-за чаго час ад часу ўзнікаюць праблемы з дастаўкай газавых балонаў. Тут жа старшыня сельвыканкама патлумачыў, што па левым баку вуліцы людзі бралі ўчасткі для забудовы. Гэтым участкам прысвойваўся нумар, але ў далейшым дамы не ўзводзіліся, таму і атрымалася блытаніна. На наступны дзень пасля сустрэчы ўпраўляючы справамі райвыканкама звязалася з кіраўніцтвам Крупскага раёна газазабеспячэння, каб адрэгуляваць пытанне з дастаўкай балонаў. На яе запыт было прапанавана тым жыхарам, у якіх нумар дома не адпавядае нумару ў газавай службе, звярнуцца ў Цэнтр абслугоўвання насельніцтва Крупскага раёна гаазабеспячэння з тэхпашпартам і сваім пашпартам. На месцы вырашылася і пытанне з перастаноўкай кантэйнераў для збору камунальных адходаў, якія, як адзначалася, згодна заключаных дагавораў, вывозяцца рэгулярна. Калі размова зайшла пра знос непрыгодных для пражывання дамоў, высветлілася, што такіх толькі два, і сёлета яны будуць знесены.
Напрыканцы Валянціна Сенцова нагадала прысутным на сустрэчы, што 17 лістапада пройдуць выбары дэпутата Палаты прадстаўнікоў Нацыянальнага сходу Рэспублікі Беларусь. Выбарчы ўчастак, які размешчаны ў будынку Крупскага сельвыканкама, ужо адкрыты для наведвання жадаючых удакладніць, ці ёсць яго прозвішча ў спісах альбо азнаёміцца з перадвыбарнымі матэрыяламі.
