Новы год, Каляды – адны з самых любімых святаў як у дзяцей, так і ў дарослых. Можа быць таму, што з імі звязаны надзеі на абнаўленне жыцця, на тое, што ў новым годзе абавязкова збудуцца патаемныя мары кожнага з нас, што «новае шчасце» нікога не абыдзе бокам.А яшчэ таму, што добры настрой, як правіла, падтрымліваецца традыцыйным абменам падарункамі, пажаданнямі шчасця і наяўнасцю навагодняга дрэўца – у нашым выпадку ёлкі, – вакол якой звычайна і разгортваецца святочнае чароўнае дзейства.
Аб набліжэнні навагодніх святаў першымі сваё слова ўжо сказалі вітрыны магазінаў. У хуткім часе пачнецца ўстаноўка ёлак на плошчы горада і ў асобных яго мікрараёнах. А на бытавым узроўні які ўжо год многія вырашаюць, якой ёлачцы аддаць перавагу – штучнай або натуральнай?
Як вядома, напярэдадні Новага года асобнымі грамадзянамі вядзецца незаконная нарыхтоўка навагодніх ёлак і іншых дрэў хваёвых парод у лясах дзяржаўнага ляснога фонду. Нагадаем, што за незаконную высечку дрэва з ляснога фонду парушальнікам пагражае пакаранне ў выглядзе адміністрацыйнага штрафу, які складае ад 5 да 50 базавых велічынь на фізічную асобу, ад 20 да 200 базавых велічынь на індывідуальнага прадпрымальніка, а таксама кампенсацыя шкоды, прычыненай дзяржаве.
Таму, перш чым ісці ў лес за навагодняй прыгажуняй, варта задумацца: ці будзе гэты «падарунак» прыемны да Новага года? Тым больш, што да свята Крупскі лясгас нарыхтуе і паставіць на ёлачныя базары, якія адкрыюцца ў 20-х чыслах снежня, сотні дрэў. Набыць дрэўка можна будзе і непасрэдна ў лясніцтвах. Дарэчы, пакупнікам будуць прапаноўваць не толькі ёлкі і сасёнкі, але і дрэўцы ў кадках.
Нарыхтоўка навагодніх ёлак праводзіцца згодна з устаноўленым парадкам.
ДА ЎВАГІ. У пераднавагодні перыяд лясная ахова ўзмоцніць ахову лясных масіваў ад незаконных высечак. Будуць арганізаваны рэгулярныя рэйдавыя мерапрыемствы. На дарогах лясгас разам з раённай інспекцыяй прыродных рэсурсаў і аховы навакольнага асяроддзя ўстановіць кантрольныя пасты.
