Менавіта тут захоўваюцца лепшыя здабыткі народных рамёстваў і перадаюцца падрастаючаму пакаленню. Мы пабывалі там падчас правядзення экскурсіі для школьнікаў. Кіраўнік клуба майстроў «Таленты Крупшчыны» Вольга Северына сустракала гасцей у народным адзенні і саламяным какошніку па беларускаму звычаю – хлебам-соллю. Як увішная гаспадыня, яна запрасіла гасцей у майстэрні. Расказала, чаму можна навучыцца ў гуртках, пра тэхніку выканання вырабаў. Затым прапанавала паўдзельні­чаць у майстар-класах, якія правялі Ніна Цэхавая і Лідзія Свяцкая. Дзеці мелі магчымасць далучыцца да чароўнага свету майстэрства.

– Неяк прыйшла на экскурсію ў Дом рамёстваў, – расказвае крупчанка Наталля Барадуніна. – Аказалася, што гэта сапраўдны «Дом цудаў» – так мяне ўразілі вырабы майстроў. Расказала дома. На наступны дзень прывяла дзевяцігадовую дачку Дашу на майстар-клас. Яна паспрабавала плесці з саломкі. І што вы думаеце? У яе адразу ўсё атрымалася.

– І цяпер я наведваю гурток па саломапляценню, – уступае ў размову Даша. – Зрабіла зубатку. Яна служыць упрыгож­ваннем для саламяных ваз, капелюшоў. Планую сплесці жывёл. Хоць гэта і працаёмкая работа, але вельмі займальная. Калі пачынаеш плесці, ужо не можаш адарвацца, пакуль не скончыш. Мне вельмі падабаюцца шкатулкі, упрыгожванні. Усе свае выра­бы буду калекцыяніраваць, а таксама да­рыць родным людзям.

Каб падзяліцца ўражаннямі і пагутарыць, усе сабраліся ля печы за сталом, на якім ужо стаялі нагрэты чайнік і салодкія прысмакі.

– У Доме рамёстваў я ўпершыню, – дзеліцца сямікласніца Дар’я Сідарава. – Не раз бачыла на розных выставах і ў крамах саламяныя сувеніры, але ні разу не задумвалася, як гэта робіцца. Аказваецца, даволі цікавы занятак. Упэўнілася ў гэтым падчас майстар-класа.

– Мяне ўразіў ткацкі станок, – кажа дзевяцікласнік Саша Струпінскі. – Пра яго я чуў неаднаразова, чытаў у гістарычных кнігах. Вольга Іванаўна так умела з ім упраўлялася, што на нейкі момант здалося, што мы трапілі на машыне часу ў мінулае. Інтэр’ер, прылады, рушнікі – усё, як у нашых продкаў.

Напрыканцы Вольга Северына падаравала гасцям памятныя сувеніры і запрасіла да сумесных творчых дзеянняў:

– Дзверы нашага Дома рамёстваў шырока адчынены для прыхільнікаў народнай і дэкаратыўна-прыкладной творчасці.

Іна ГАРА.

Фота Аляксандра БУДЗЬКО.