Менавіта ў Халопенічах нарадзіўся беларускі этнограф, фалькларыст і вучоны. Але найбольш вядомы ён як бацька генія беларускай паэзіі Максіма Багдановіча. З моманту адкрыцця помніка прайшло ўжо 24 гады.
– Помнік быў устаноўлены ў 1997 годзе за кошт сродкаў Саюза пісьменнікаў Беларусі, – расказвае старшыня Халопеніцкага сельвыканкама Андрэй Вакулаў. – Падзея была прымеркавана да 135-годдзя з дня нараджэння Адама Багдановіча. З цягам часу помнік страціў прывабнасць і эстэтычны выгляд. Ды і рукі вандалаў «папрацавалі»: у надпісе «Вучоны, этнограф, фалькларыст» сарвалі слова «вучоны».
Рэстаўрацыю помніка выканалі спецыялісты прыватнага прадпрыемства “Віттэхінвест”.
– Фірма займаецца аднаўленнем помнікаў у раёне не першы год, – працягвае Андрэй Вакулаў. – Гады два назад спецыялісты прадпрыемства адрэстаўравалі помнік загінулым воінам на Халопеніцкіх могілках. Работы над помнікам Адаму Багдановічу працягваліся тыдзень. І вось мясцовая славутасць радуе жыхароў і гасцей пасёлка. Захаваць і зберагчы культурныя здабыткі для нашчадкаў – наш абавязак.
Іна ГАРА.
