Раённы экалагічны конкурс «Казачны палац», арганізатарамі якога сталі аддзел адукацыі, спорту і турызму, аддзел ідэалагічнай работы, культуры і па справах моладзі райвыканкама, інспекцыя прыродных рэсурсаў і аховы навакольнага асяроддзя, эколага-патрыятычны клуб «Спадчына», праходзіў у два этапы.На раённы этап конкурсу ад устаноў адукацыі былі прадстаўлены па дзве работы ў наступных намінацыях: «Кожнаму шпаку па палацу» і «Усім сініцам па камфортных дамах».
– Мэта нашага конкурсу – выхаванне любові і павагі да роднага краю, папулярызацыя экалагічных ведаў сярод навучэнцаў, прыцягненне іх да прыродаахоўнай дзейнасці, – гаварыў падчас загрузкі ў машыну шпакоўняў і сінічнікаў кіраўнік эколага-патрыятычнага клуба «Спадчына» Міхаіл Рогаў. – Ужо зараз мы пераканаліся ўвачавідкі, як адказна і творча падышлі да вырабу домікаў для птушак літаральна ўсе школьнікі. Гэтыя домікі выраблены з сухой драўніны, у многіх з іх здымныя дахі, для дэкору выкарыстаны элементы пластыкавых бутэлек, асобныя пафарбаваны ў зялёны колер, ёсць нават шпакоўня ў выглядзе твара чалавека: з носам, ротам, бровамі.
І сапраўды, на ўроках працы ў школьных майстэрнях сумаваць не даводзілася. Пад кіраўніцтвам настаўнікаў працы хлопчыкі і дзяўчынкі спрытна спраўляліся з малатком, нажоўкай і шрубавёртам. З-пад іх рук выходзілі сімпатычныя драўляныя домікі. Усе вучні школ, якія прымалі ўдзел у вырабе шпакоўняў і сінічнікаў, узнагароджаны Дыпломамі. Асоба быў адзначаны шпакоўнік, які вырабілі бацька з сынам – Андрэй Васільевіч Жораў з Дамірам – вучнем Ухвальскай СШ.
І вось у мінулую пятніцу навучэнцы 9 «Б» класа раённай гімназіі Улад Закрэўскі, Антон Бульбачкін і Архіп Змітраковіч і (на здымках) развесілі шпакоўні і сінічнікі на дрэвах па дарозе непадалёк ад заправачнай станцыі і ў парку горада.
