Таццянін дзень, які лічыцца днём студэнцтва, стаў сапраўдным святам у нашай установе адукацыі. Менавіта ў гэты дзень вучні і педагагічны калектыў школы шчыра віталі студэнтаў, якія ў хуткім часе павінны прыйсці на работу ва ўстановы адукацыі, стаць настаўнікамі, «сеяць добрае, разумнае, вечнае» ў сэрцах сваіх вучняў.Сёлетні «Зорны паход» стаў 53 паходам з часу свайго існавання. У нашу ўтульную школу завіталі студэнты філалагічнага факультэта Беларускага дзяржаўнага педагагічнага ўніверсітэта імя Максіма Танка, а таксама студэнты Маскоўскага педагагічнага дзяржаўнага ўніверсітэта. Сапраўдным сюрпрызам сталі студэнткі з Туркменістана, якія вучацца ў БДПУ. Таму своеасаблівай рысай «Зорнага паходу» стала інтэрнацыянальнасць.
Гасцінна расчыніў свае дзверы перад будучымі настаўнікамі народны гісторыка-краязнаўчы школьны музей. Нашы экскурсаводы Аліна Бараўцова, Лізавета Навіцкая, Святлана Мамыка, Кацярына Мазнёва правялі цікавую азнаямляльную экскурсію па асноўных раздзелах музея. З захапленнем студэнты разглядалі цікавыя і рэдкія экспанаты: прылады працы нашых продкаў, археалагічныя знаходкі і гэтак далей. Асабліва да спадобы гасцям стала экспазіцыя «Беларуская хатка». Вучні 5 класа Крысціна Камарова, Ганна Гарбачова, Максім Маласай і Канстанцін Глебка распавялі гасцям паэтычную легенду знакамітай выпускніцы Алены Якаўлевай пра паходжанне назвы вёскі Ігрушка.
Нікога з вучняў і настаўнікаў не пакінула абыякавым выступленне ўдзельнікаў «Зорнага паходу». Са школьнай сцэны гучалі патрыятычныя песні і вершы, жартоўныя сцэнкі пра каханне і здачу сесіі. Яркім было выступленне танцавальнага калектыву «Барыня», выкананне песні з кінафільма «Тытанік». Слухачоў вельмі ўразілі вершы на туркменскай мове. Прагучалі яны ў выкананні студэнткі з Туркменістана, а іх аўтарам з’яўляецца бацька дзяўчыны. Шчымлівыя радкі, якія нагадваюць кожнаму, што любоў да Айчыны – самае светлае пачуццё чалавека, асабліва глыбокае ўдалечыні ад роднай зямлі.
Будучыя настаўнікі правялі з вучнямі разнастайныя майстар-класы, якія вельмі спадабаліся дзецям рознага ўзросту: «Асновы рытарычнага майстэрства», «Цудадзейная скрынка», «Асновы харэаграфіі» і іншыя.
Падарункам артыстам «Зорнага паходу» сталі «Беларускія вячоркі» ў выкананні вучняў нашай школы. У ходзе свята да нас далучыліся дэкан філалагічнага факультэта, наш зямляк, Васіль Дзянісавіч Старычонак і загадчык аддзела адукацыі, спорту і турызму райвыканкама Лідзія Іванаўна Бачышчава.
«Зорны паход» падараваў і вучням, і гасцям незабыўныя ўражанні, шчаслівыя моманты шчырых, цёплых узаемаадносін.
Вольга КАЗАК, настаўніца беларускай мовы і літаратуры ДУА «Ігрушкаўская сярэдняя школа Крупскага раёна».
