Аб Сусветным дні без аўтамабіля і мерапрыемствах, якія будуць праходзіць у гэты час, расказвае галоўны спецыяліст раённай інспекцыі прыродных рэсурсаў і аховы навакольнага асяроддзя Ніна КРАСЬКО:

– Вядома, што аўтамабілі не толькі забруджваюць атмасферу, але і забіраюць у нас грамадскую прастору: вуліцы, двары, зялёныя зоны. Таму эколагі і заклікаюць унесці свой уклад у агульную справу аднаго дня і адмовіцца ад выкарыстання аўтамабіля. Падлічана, што доля шкодных выкідаў у навакольнае асяроддзе прамысловых прадпрыемстваў Мінска – 15-20%, усё астатняе – «заслуга» аўтамабільнага транспарту.

А рашэнне праблем, безумоўна, залежыць ад многіх фактараў. У прыватнасці, ад абнаўлення аўтапарка, павышэння якасці паліва, удасканалення гарадской інфраструктуры, у тым ліку для веласіпедыстаў, будаўніцтва шматузроўневых развязак, развіцця сістэмы грамадскага, асабліва электрыфіцыраванага, транспарту, іншых важных аспектаў.

На працягу Еўрапейскага тыдня мабільнасці праводзіцца нямала асветніцка-адукацыйных кампаній, пазнавальных мерапрыемстваў, а таксама тэматычныя веласіпедныя і пешыя экскурсіі. Традыцыйна ў сталіцы будуць арганізаваны тэматычныя семінары, прэс-канферэнцыі, выставы, велапрабегі, гульнёвыя праграмы для дзяцей і моладзі. праводзяцца работы па абуладкаванні велапарковак, паніжэнні бардзюраў, арганізуецца бясплатны праезд у грамадскім транспарце для ўладальнікаў аўтамабіляў і г.д.

У Дзень без аўтамабіля 22 верасня ў буйных гарадах аўтамабілістам прадаставяць бясплатны праезд у грамадскім транспарце. Для гэтага трэба прад’явіць вадзіцельскае пасведчанне і тэхпашпарт на машыну. У Мінску, да прыкладу, у 2016 годзе гэтым правам скарысталіся 6,5 тыс. жыхароў горада, у 2017-м – 16,5 тыс.

Дзень без аўтамабіля – заключнае мерапрыемства Еўрапейскага тыдня мабільнасці. 22 верасня з 6.00  да 24.00 на вул. Леніна горада Мінска будзе перакрыты рух аўтамабільнага транспарту. Участак гэтай вуліцы ад праспекта Незалежнасці да вуліцы Кірава пераўтворыцца ў святочную пляцоўку. У 14.00 тут стартуе дзіцячая забаўляльная праграма. Наведвальнікаў чакаюць гульні, конкурсы, аквагрым і твыстынг, канцэрт. На пляцоўцы будзе арганізаваны фуд-корт. Тут жа будуць праводзіцца экалагічныя майстар-класы і конкурсы. Прызначана прэзентацыя электравеласіпедаў, электрасамакатаў, электраскутараў. Таксама адбудзецца выстава дрэў і кветак ад батанічнага сада. Уладальнікі двухколавага транспарту змогуць наведаць пункт страхавання веласіпедаў і, як кажуць, на ўсялякі пажарны заключыць адпаведны дагавор. Таксама будзе магчымасць зрабіць бясплатны рамонт і наладку жалезнага каня. Многіх, пэўна, зацікавіць выстава веласіпедаў ад сталічнага вытворцы. Выпрабаваць незвычайныя адчуванні можна будзе ў аўтамабілі-перавёртышы ад Мінскага гарадскога ўпраўлення МНС.

З 17.00 на пляцоўцы пачнецца канцэрт. Вечарам да ўвагі наведвальнікаў тэатр «ИнЖест» прапануе перфарманс. У праграме мерапрыемства таксама экстрым-выступленні веласіпедыстаў, шоў-конкурс веласіпедаў, якія свецяцца, жывыя скульптуры і многае іншае. А ў 21.00 арганізатары свята прапануюць паўдзельнічаць у начной велапрагулцы да Нацыянальнай бібліятэкі.

Акрамя таго, падчас правядзення акцыі можна абмеркаваць тэму развіцця веласіпеднага руху, а таксама яшчэ раз напомніць жыхарам аб праблемах, што наносіць аўтамабіль. Карацей кажучы, чым больш людзей хоць бы часам адмовяцца ад асабістага аўта і перасядуць на веласіпед, тым чысцейшым будзе паветра, якім мы ўсе дыхаем. Да месца адзначыць, што мерапрыемствы ў Дзень без аўтамабіля будуць арганізаваны і ў нашым раёне.