Стварэнне ўсесаюзнай піянерскай  арганізацыі супала з адміністратыўна-тэрытарыяльнай рэформай. Згодна з ёй замест акруг у Беларусі было створана больш за 100 раёнаў, у тым ліку і Крупскі. Адпаведна пачала адлік сваёй гісторыі і Крупская раённая піянерская арганізацыя. Гэта супала таксама і са школьнай рэформай – пераходам да ўсеагульнага абавязковага навучання, а затым і да сямігадовай адукацыі. Адпаведна і ў школах, у якіх дзеці дасягнулі піянерскага ўзросту, пачалі стварацца піянерскія арганізацыі.

Таксама пачалі працаваць піянерскія атрады сярод дзяцей работнікаў прамысловых прадпрыемстваў. Таму яны так і называліся, напрыклад, піянерская арганізацыя фабрыкі «Саломка», альбо фабрыкі імя Вароўскага.

Піянеры ва ўсім імкнуліся дапамагаць сваім старэйшым сябрам – камсамольцам, ды і працавалі яны пад кіраўніцтвам камсамольскіх ячэек.

Развіваўся і шырыўся піянерскі рух і ў 1930-я гады, падчас калектывізацыі. З утварэннем калгасаў і пашырэннем сеткі школьных устаноў павялічвалася і колькасць піянерскіх атрадаў.

Сапраўднае супраціўленне піянеры-патрыёты арганізавалі супраць ворага падчас Вялікай Айчыннай вайны, у тым ліку і ў Крупскім раёне. Успомнім піянера, партызана Барыса Крывашэіна, які пасмяротна быў узнагароджаны ордэнам Айчыннай вайны.

На прыкладзе піянераў-герояў выхоўваецца як у пасляваенныя гады, так і ў цяперашні час не адно пакаленне моладзі. У свой час я працаваў сакратаром па школах Крупскага райкама камсамола і адначасова выконваў абавязкі старшыні Крупскай раённай піянерскай арганізацыі. Работа была ў асноўным накіравана на працоўнае і патрыятычнае выхаванне школьнікаў. Немалы ўклад уносілі Саветы піянерскіх дружын і піянерскіх атрадаў на месцах. Узначальвалі гэту работу, акрамя старшынь Саветаў дружын і атрадаў, таксама піянерважатыя. У некаторых школах яны ўваходзілі ў штат педагагічных калектываў, у іншых, пераважна васьмігадовых, часта выконвалі свае абавязкі як сумяшчальнікі.

Успамінаецца, як святкаванне пяцідзесяці­годдзя піянерскай арганізацыі было адзначана на вышэйшым рэспубліканскім узроўні. Піянерскія важатыя Крупскіх школ № 1 і № 2 Наважылава Раіса, Беспаяська Людміла, Халопеніцкай школы-інтэрната Макрыцкая Святлана і іншыя былі адзначаны высокімі ўзнагародамі, пачынаючы ад раённага ўзроўню і заканчваючы Ганаровымі граматамі Вярхоўнага Савета БССР і нават медалём «За працоўную адзнаку».

Піянерыя раёна шырока святкавала ў школах, а лепшыя атрады і дружыны – на раённым злёце, дзе прысутнічала ўсё кіраўніцтва. Піянерскія атрады і дружыны ганаровым маршам прайшлі цераз увесь пасёлак пад гукі горнаў і піянерскіх барабанаў з разгорнутымі сцягамі. Пасля ўрачыстасці пачаліся спартыўныя спаборніцтвы, выступленне мастацкай самадзейнасці. Скончылася свята традыцыйным агульным піянерскім вогнішчам.

А далей зноў пацягнуліся піянерскія будні…

Дзмітрый ХРОМЧАНКА, кандыдат гістарычных навук, былы старшыня Крупскай раённай піянерскай арганізацыі.