Адметна і тое, што гаспадарка адной з першых у раёне разлічылася з дзяржзаказам па здачы пшаніцы: на Барысаўскі камбінат хлебапрадуктаў яе здадзена 1000 тон.

Па дарозе на збожжавыя палеткі намеснік дырэктара гаспадаркі па ідэалагічнай рабоце Алена Рабчынская расказвала:

– Як захапілі першынство на жніве ў гэтым годзе Сяргей Рэуцкі і Іван Паўлавец, так упэўнена і ўтрымліваюць яго. Збожжавыя палеткі яны ўбралі ўжо ў Зароўі, Ротані, на Ігрушцы, у Худаўцах. Дзе перш за ўсё паспее збожжа, туды і трымаюць кірунак хлопцы. Да месца адзначыць, гэты экіпаж першым стаяў і падчас раённага свята «Зажынкі», распачаць якія выпаў гонар  нашай гаспадарцы. На сённяшні дзень (а мы былі тут у чацвер, – аўт.) яны намалацілі 580,6 тон збожжа. Гэты экіпаж па выніках дзесяцідзёнкі выйшаў пераможцам у спаборніцтве, узнагароджаны Падзячным пісьмом кіраўніцтва гаспадаркі і падарункам. Аналагічную ўзнагароду атрымаў і вадзіцель Анатоль Куляй, на рахунку якога ўжо тысяча, а дакладней, 1024 тоны перавезенага збожжа на такі. 

Далей Алена Васільеўна дала характарыстыку кожнаму названаму працаўніку. Сяргей Рэуцкі, напрыклад, раней працаваў у ААТ «Кляновічы», але ўжо гадоў сем, як рупіцца на палетках таварыства «МайскаеАгра». Яму падуладна любая сельскагаспадарчая тэхніка. Яго памочнік – Іван Паўлавец – супрацоўнік пажарна-аварыйнага выратавальнага паста аграгарадка Худаўцы таксама не першы год падчас уборкі прыходзіць на дапамогу гаспадарцы. 37 гадоў працоўнага стажу на адным месцы ў вадзіцеля Анатоля Куляя. Яго 20-тонны «МАЗ» не ведае прастояў, а сам Анатоль Іванавіч – пастаянны пераможца спаборніцтва і ўдзельнік раённага свята «Дажынкі».

Добрыя словы былі сказаны таксама ў адрас Леаніда Камарова, які працуе ў Крупскім ПМС, але на перыяд жніва перасаджваецца на камбайн, Мікалая Сапрановіча, які таксама шмат гадоў аказвае пасільную дапамогу вытворчаму ўчастку «Ігрушка», механізатара з Ротані Сяргея Шылы. Заслугоўвае пахвалы і малады вадзіцель Максім Панкратаў. Хлопец толькі нядаўна прыйшоў у гаспадарку, яму даверылі «МАЗ» грузапад’ёмнасцю 8 тон і ўжо з першых дзён уборкі ўраджаю ён паказвае прыклад. За гэты час перавёз ад камбайнаў 880 тон збожжа. Падзячныя пісьмы і падарункі па выніках першай дзесяцідзёнкі атрымалі работнікі, занятыя на збожжасушылках. Гэта – Віктар Харламаў, Уладзімір Герасімаў і Ігар Гара.

– Добра, што на змену дастаткова дажджліваму ліпеню прыйшла жнівеньская спякота, – працягвала Алена Васільеўна. – У разгар уборкі яна толькі на руку нам, бо зерне практычна ўжо сухое. Галоўнае, што сёння ўсе ўдзельнікі жніва разумеюць: хлеб, што вырас на палях, трэба ўбраць хутка і якасна. І з добрым настроем і хлебаробскім азартам яны шчыруюць з самага ранку да позняга вечара. Учора, напрыклад, жніўныя палеткі апошні камбайн пакінуў з цёмным, ужо дзесьці а палове адзінаццатай гадзіны.

Штодзень у гонар перадавікоў на мехдварах у Ротані і Ігрушцы ўзнімаецца Флаг працоўнай славы, у дыспетчарскіх змяшчаецца бюлетэнь налічэння заработнай платы за папярэдні дзень. У гэтыя гарачыя дні ўсе забяспечаны вадой. Абеды гатуюцца ў сталовай аграгарадка Ротань. Повар Святлана Лыкава імкнецца разнастаіць меню, таму і стараецца. У гэтым ёй дапамагае Ніна Ермаловіч. І абеды, і падвячоркі дастаўляюцца тым, хто заняты на жніве, на дзвюх аўтамабілях «Газель», а раздае іх Ірына Поляк, якая таксама знаходзіць цёплае слова для кожнага. 

...Зрабіўшы фотаздымак перадавога экіпажа і пагутарыўшы з хлопцамі, мы пакідалі палеткі. А яны хуценька занялі свае месцы ў кабіне і палявы карабель рушыў па палетках з аўсом, які вырас тут на славу, пакідаючы пасля сябе золата саломы.