Школы, дзіцячыя садкі, паліклінікі, спартыўныя і культурныя пляцоўкі – у вобласці ідзе актыўнае будаўніцтва сучасных аб’ектаў. І Міншчыне напярэдадні юбілейнай даты сапраўды ёсць што сказаць.
На адкрыцці кожнага аб’екта абавязкова прысутнічае кіраўнік сталічнага рэгіёна Аляксандр Турчын – пытанне пастаянна знаходзіцца на яго асабістым кантролі, і яго намаганнямі вырашаюцца істотныя праблемы ў рэгіёнах.
Год стаў надзвычай «ураджайным» на новыя сацыяльныя аб’екты. Возьмем, да прыкладу, толькі апошнія тры месяцы.
Школа новага пакалення ў маладым мікрараёне ў Смалявічах расчыніла свае дзверы якраз 1 верасня. Больш за тысячу дзетак там навучаюцца па самых сучасных тэхналогіях. Лінгафонныя кабінеты (у тым ліку для вывучэння кітайскай мовы), камп’ютарныя класы, спартыўныя і танцавальныя залы, майстэрні, басейн і нават уласны Цэнтр бяспекі МНС.
На ўрачыстасці з нагоды адкрыцця Аляксандр Турчын зазначыў, што ў горадзе ў мінулым годзе здалі дзіцячы сад, пабудавалі дарогу, а сёлета распачнецца будаўніцтва паліклінікі.
Эстафету Смалявічаў пераняла Любань. Там чырвоную стужку перарэзалі ў новым дзіцячым садку. Сучаснае функцыянальнае абсталяванне, кабінеты для заняткаў і гульняў, моцная спартыўная база. Па апошніх патрабаваннях арганізавана і добраўпарадкавана прылеглая тэрыторыя. Узведзены аб’ект быў менш чым за год. А Аляксандр Турчын падкрэсліў, што Міншчына дынамічна развіваецца і будуе, у тым ліку аб’екты сацыяльнай сферы, і ў бліжэйшай перспектыве адзначыў комплексныя змяненні ў Фаніпалі.
Менавіта туды неўзабаве за кіраўніком сталічнага рэгіёна накіраваліся і журналісты – занатаваць урачыстае адкрыццё дзіцячага садка. Яшчэ зусім нядаўна на той пляцоўцы было поле, а цяпер літаральна на вачах расце новы мікрараён.
Абсталявана дашкольная ўстанова па апошнім слове тэхнікі. Тут і інтэрактыўныя горкі, скаладром, мультстудыя, лега-пакой і мноства іншых сучасных опцый.
– Такія гарады як Фаніпаль мы развіваем комплексна. Я ўжо неаднаразова гаварыў, што транспартная, інжынерная інфраструктура – гэта зона адказнасці дзяржавы. На прыкладзе Фаніпаля мы ў бліжэйшыя два гады ўбачым, як гэта ўсё развіваецца, – адзначыў старшыня Мінаблвыканкама. – З аднаго боку, будуецца жыллё для шматдзетных сем’яў, для тых, хто мае патрэбу і не толькі. З іншага боку – адкрываецца сад, запуск якога – апераджальны крок у развіцці інфраструктуры Фаніпаля. Гэта значыць, мы падцягваем інфраструктуру горада да жылля, якое будуецца. Поўным ходам ідзе будаўніцтва ФАКу. У наступным годзе мы яго здадзім. Пачынаецца будаўніцтва школы. Яшчэ адзін запланаваны аб’ект – паліклініка. Мы плануем, што ў бліжэйшыя гады комплексна завершым забудову Фаніпаля. І вырашым усе назапашаныя за гады праблемы. Гэта і водазабеспячэнне, і каналізацыя, і дарогі, і вуліцы.
Чарговая значная падзея адбылася ў Дзяржынску. Там у цэнтральнай раённай бальніцы адкрылі новы дыягнастычны корпус. Маштабнае будаўніцтва корпуса агульнай плошчай больш за 1000 квадратных метраў разгарнулася зімой. Нягледзячы на шэраг акалічнасцяў эканамічнага і тэхнічнага характару, будоўля не спынялася ні на адзін дзень.
У дыягнастычным корпусе зараз будуць размяшчацца кабінеты рэнтгенаўскай камп’ютарнай тамаграфіі (КТ), магнітна-рэзананснай тамаграфіі (МРТ), ультрагукавой дыягностыкі, а таксама мануальнай тэрапіі. На ўрачыстасці з нагоды адкрыцця Аляксандр Турчын зазначыў, што з’яўленне такога аб’екта ў Дзяржынску не выпадкова. На працягу цэлага шэрагу гадоў раён імкліва развіваецца: ствараюцца новыя вытворчасці, будуецца жыллё і, як следства, штогод павялічваецца насельніцтва. Таму сучасны дыягнастычны корпус тут быў вельмі патрэбен.
– Ахова здароўя – адзін з прыярытэтаў нашай работы, – гаварыў Аляксандр Турчын. – І мы бачым у сярэднетэрміновай перспектыве неабходнасць укладання сродкаў у гэтую сферу. Акрамя клопату аб пацыентах, павінен быць клопат і аб медыцынскім персанале. На мой погляд, так павінна быць у нашай краіне ў 21-м стагоддзі. Але для гэтага нам усім трэба шмат працаваць.
Тады ж старшыня аблвыканкама анансаваў яшчэ два буйныя аб’екты, якія падыходзяць да свайго адкрыцця ў Мінскім раёне.
І вось наступны маршрут – Азярцо. Паліклініка размясцілася ў вялікім трохпавярховым будынку, абсталявана сучаснай медыцынскай тэхнікай і абсталяваннем – новая ўстанова аховы здароўя не ідзе ні ў якое параўнанне з невялікай амбулаторыяй, якая раней абслугоўвала насельніцтва аграгарадка. Зараз з’явілася магчымасць аказваць кваліфікаваную медыцынскую дапамогу па такіх спецыяльнасцях, як акушэрства і гінекалогія, афтальмалогія, неўралогія, хірургія, стаматалогія, педыятрыя, фізіятэрапія, лабараторная дыягностыка і інш. Усе рабочыя месцы абсталяваны высокапрадукцыйнымі камп’ютарамі, аргтэхнікай і спецыялізаваным медыцынскім праграмным забеспячэннем. Ёсць кабінет для персанала з усім неабходным, нават трэнажорамі.
Узвядзенне Азярцоўскай паліклінікі пачалося ў жніўні 2021 года.
– Вельмі ўдалы атрымаўся аб’ект, добрае праектнае рашэнне, добрая падрадная арганізацыя, якая падчас забудовы ўносіла свае карэктывы. Мне здаецца, з пункту гледжання функцыянальнасці будынак атрымаўся блізкім да ідэальнага, – сказаў Аляксандр Турчын. – Гэта рашэнне яшчэ адной застарэлай праблемы Мінскага раёна. Таму што стары будынак, дзе размяшчалася амбулаторыя, і новая паліклініка – гэта непараўнальна.
Па словах старшыні Мінскага аблвыканкама, у бліжэйшай перспектыве ў Мінскім раёне з’явіцца паліклініка ў Бараўлянах: гэта будзе яшчэ больш маштабны аб’ект.
– І фактычна новае прыёмнае аддзяленне Мінскай ЦРБ, якое адпавядае ўсім сучасным патрабаванням, што прад’яўляюцца да медыцыны. Наступны год – гэта паліклініка ў Заслаўі. Гэта што да планаў па Мінскім раёне. Думаю, у наступным годзе разам з горадам пачнем таксама будаўніцтва паліклінікі ў Смалявічах. І плюс капрамонты, набыццё абсталявання ў раённыя і абласную бальніцы.
І на гэты раз таксама кіраўнік сталічнага рэгіёна падкрэсліў, што сацыяльная сфера – у цэлым прыярытэт. Расказаў, што ў Старых Дарогах завяршаецца будаўніцтва фізкультурна-аздараўленчага комплексу, шмат планаў і на наступны год.
І вось чарговая навіна са Старых Дарог: шматфункцыянальная спартыўная зала ўрачыста адчыніла свае дзверы. Басейн быў уведзены ў строй яшчэ летась, і вось другая чарга. Цяпер фізкультурна-аздараўленчы комплекс «АкваСтар» запрацаваў у поўную сілу.
Дарэчы, падобны комплекс зараз будуецца ва Уздзе, і Аляксандр Турчын нядаўна асабіста азнаёміўся, як там ідуць справы. Дзве чаргі аб’екта ўзводзяцца разам, а запланаваны тэрмін здачы – другі квартал 2023 года.
У зоне ўвагі кіраўніцтва вобласці – і сфера культуры. З апошняга – у Стоўбцах дзіцячая школа мастацтваў перасялілася ў новы будынак. Раней яна размяшчалася ў двухпавярхоўцы 1924 года пабудовы. Цяпер – у трохпавярховым добраўпарадкаваным будынку, праўда, не з нуля, а пасля грунтоўнай рэканструкцыі. Аляксандр Турчын асабіста паглядзеў, як усё арганізавана. У навучальных кабінетах – новая сучасная мэбля, музычныя інструменты і прылады, гуказапісвальнае абсталяванне і апаратура для харэаграфічных залаў, аргтэхніка. Раз цяпер дазваляюць магчымасці, то з наступнага навучальнага года запланавана адкрыць клас камп’ютарнай графікі і аддзяленне дэкаратыўна-прыкладнога мастацтва.
– Сустракаючыся з моладдзю ў рэгіёнах, заўсёды пытаюся, чаго не хапае. Як правіла, гэта кінатэатр, месцы для сустрэч і зносін. І разумееш, што культурны складнік адыгрывае ў жыцці людзей важную ролю, – адзначыў кіраўнік сталічнага рэгіёна.
Дарэчы, Стоўбцы завяршаюць маштабны праект з Прэзідэнцкім спартыўным клубам па адкрыцці ў кожным райцэнтры Міншчыны спартыўнай пляцоўкі.
На пастаянным кантролі знаходзіцца і рэканструкцыя дзяржаўнага мемарыяльнага комплекса «Хатынь». У верасні Аляксандр Турчын паказваў, што ўжо зроблена, Прэзідэнту Беларусі Аляксандру Лукашэнка. Асноўная ўвага зараз – будаўніцтву музея. Кіраўнік дзяржавы канцэпцыю яго афармлення ўхваліў.
Нельга не адзначыць і яшчэ такую падзею, як помнік Якубу Коласу ў Стаўбцоўскім раёне, які Аляксандр Турчын урачыста адкрыў да 140-годдзя з дня нараджэння паэта.
Весці пералік таму, што робіцца на Міншчыне для стварэння камфортнага асяроддзя для людзей, можна вельмі доўга. У гэтым кантэксце нельга не адзначыць, што паскоранымі тэмпамі вядзецца будаўніцтва жылля. Камітэт па архітэктуры і будаўніцтве аблвыканкама агучыў лічбы: за дзевяць месяцаў бягучага года ў цэнтральным рэгіёне ўведзена ў эксплуатацыю 689,6 тыс. кв. м агульнай плошчы жылых дамоў пры заданні 650 тыс. кв.м. З дзяржаўнай падтрымкай пабудаваны 181,1 тыс. кв.м жылля, а гэта на 51,1 тыс. кв.м больш, чым планавалася. Усяго ў 2022 годзе ў вобласці павінны ўвесці ў эксплуатацыю 1 000 000 кв.м агульнай плошчы жылых дамоў. З іх 200 тыс. кв.м будуюцца для тых, хто мае патрэбу.
Сапраўды грандыёзная праводзіцца работа. Гады ідуць, а Міншчына прыгажэе і маладзее. І нельга не адчуваць гонар за тое, што мы – яе жыхары. Здаецца, невялікі наш Крупскі раён, але і ён – годная частка сталічнага рэгіёна. У наступны раз раскажам нашым чытачам, што будуецца ў нас, што праектуецца і што ў планах.
