Не памылюся, калі скажу, што ўсе нашы чытачы ведаюць аб тым, што калектыў работнікаў Крупскага льнозавода – вопытны, зладжаны, працавіты. Аб гэтым неаднаразова гаварыў і дырэктар прадпрыемства Васіль Хоміч. А яшчэ заўважаў, што апошнім часам на работу да іх часцей уладкоўваецца моладзь. І ў тым, што гэта сапраўды дастойная змена, нам давялося пераканацца ў першыя дні мая, калі разам са старшынёй райкама прафсаюза работнікаў аграпрамысловага комплексу Валянцінай Козел мы наведалі льнозавод.А нагода таму – ушанаванне маладога механізатара Дзмітрыя Вінніка. Уручаючы Падзячнае пісьмо райкама прафсаюза работнікаў АПК і грашовую прэмію, Валянціна Анатольеўна выказала шчырую ўдзячнасць Дзмітрыю за яго добрасумленную працу падчас пасяўной кампаніі, за стараннасць і ўвішнасць. Да гэтых слоў далучылася і старшыня прафсаюзнага камітэта льнозавода Алеся Мікуліч, якая адзначыла, што Дзмітрый Віннік на прадпрыемстве працуе толькі трэці год, але і за такі невялікі адрэзак часу зарэкамендаваў сябе з самага лепшага боку, уносіў ужо і рацыяналізатарскія прапановы.
Да месца адзначыць, што сёлета пасяўныя плошчы тут складаюць 1 500 гектараў, з іх 1 300 гектараў – справа мехатрада і па 100 гектараў трэба было засеяць у ААТ «МайскаеАгра» і «Старасельскае». Механізаваны атрад ільнозавадчан выехаў на палеткі яшчэ ў 20 чыслах сакавіка, усе работы правёў якасна і ў аптымальныя тэрміны.
– Яшчэ задоўга да пачатку пасяўной я надзейна падрыхтаваў свой новы энерганасычаны трактар «МТЗ-3022», – уступіў у размову герой дня Дзмітрый Віннік. – Займаўся культывацыяй глебы на ўчастках пад лён у аграгарадку Худаўцы, вёсках Заполле, Гута, Версанка, Радзіца і іншых. Для сяўбы льну падрыхтаваў дзесьці каля 700 гектараў глебы. Калектыў прыняў мяне цёпла, калі ўзнікае якое пытанне, звяртаюся да вопытных калег, якія заўсёды падкажуць і дапамогуць. На гэтым прадпрыемстве сёння працуюць мой дзядзька і мама. Можна лічыць, што і я тут не навічок. Прыемна, што мая праца заўважана і адзначана.
Крупская ЦРБ информирует о возможности получить консультацию врача общей практики на базе УЗ «Крупская ЦРБ» 27 ноября. 
