Чарговы чэмпіянат раёна па падлёдавай лоўлі рыбы на зімнюю вудачку сярод працоўных калектываў прайшоў на зоне адпачынку «Камсамольскі бераг» возера Сялява. Агульнае кіраўніцтва правядзеннем спаборніцтваў ажыццяўляла ўпраўленне па адукацыі, спорце і турызме райвыканкама, а мэтай з’яўлялася папулярызацыя і прапаганда здаровага ладу жыцця, умацаванне здароўя, прыцягненне насельніцтва да заняткаў масавымі відамі спорту. Хочацца адразу заўважыць, што пастаўленую мэту дасягнулі стопрацэнтна – палова суботняга дня прайшла недарэмна: цудоўнае сонечнае надвор’е (асабліва пасля папярэдніх моцных вятроў), свежае паветра, узнёслы настрой і, бясспрэчна, жаданне паспаборнічаць і паспрабаваць рыбацкага шчасця.Рэгістрацыя ўдзельнікаў, згодна палажэння аб правядзенні спаборніцваў, якія былі загадзя дасланы ва ўсе працоўныя калектывы, пачалася пасля 6 гадзін раніцы суботы, 23 лютага, у гарадскім фізкультурна-аздараўленчым комплексе. І ўжо ў 7 гадзін аўтобус з рыбакамі ўзяў накірунак на Калодніцу. Цікава было слухаць рыбакоў, якія час ад часу давалі парады адзін аднаму, выказвалі спадзяванне, што клёў сёння будзе і хоць якая рыбка ды трапіць на вудачку.
...Не было яшчэ і 8 гадзін, як арганізатары спаборніцтваў выйшлі на возера і падзялілі ўчасткі на тры сектары, адзначыўшы кожны чырвонымі сцяжкамі. Затым было пастраенне каманд, а іх, дарэчы, на гэты раз аказалася 15. Намеснік начальніка ўпраўлення па адукацыі, спорце і турызме райвыканкама Уладзімір Ахрамчук, у прыватнасці, адзначыў, што сёлетні чэмпіянат раёна па падлёдавай лоўлі рыбы-2019 праходзіць якраз у Дзень абаронцаў Айчыны, ён павіншаваў усіх са святам, нагадаў палажэнне і правілы спаборніцваў, пажадаў усім удзельнікам пазмагацца за званне самых умелых і ўдачлівых.
І вось усе скіраваліся на возера. Набраўшы ў вёдры вады з падрыхтаванай лункі, удзельнікі сабраліся ў сектараў з адпаведнымі нумарамі. Заўважым, што сонца, якое якраз узнімалася, сваімі промнямі асвятляла ўсё навокал, і не было такіх, хто б не скіраваў свой позірк на яго ззянне. Адразу пасля свістка рыбаловы пачалі свідраваць лункі. Было бачна, як хтосьці дражніць рыбу лёгкай гульнёй вудачкі, а хтосьці вырашыў паспрабаваць удачу на глыбіні. Асобныя імкнуліся адысці далей, і наадварот, некаторыя выбралі месца ля самага берага.
Разам з суддзямі, якія знаходзіліся ў кожным сектары, мы назіралі, як падсякаўся акунёк і адразу трапляў у вядро з вадой, што стаяла побач, асобным пашэнціла лавіць не толькі акунькоў, але і плотак. На маё пытанне, хто з прысутных самы малады і самы старэйшы рыбак, адказ знайшоўся хутка. Самым юным аказаўся Кірыл Шукайла – вучань Худавецкай СШ. Пры размове з хлопцам высветлілася, што яго бацька – Уладзімір Шукайла – працуе ў Сяляўскім лясніцтве, на спаборніцтвы не змог паехаць, таму замест сябе адправіў сына. Кірыл таксама захапляецца рыбалкай, але летняй, сёння ўпершыню ўдзельнічае ў зімовай. А вось самы старэйшы рыбак – 65-гадовы Аляксандр Шуцько – гэтай справай займаецца з дзяцінства, ён пастаянны ўдзельнік усіх чэмпіянатаў па рыбнай лоўлі, як інструктар па спорце заўсёды на спаборніцтвы выстаўляе каманду і, дарэчы, нават не адну.
Падыходзячы да рыбакоў і размаўляючы з імі, усе ў адзін голас заяўлялі, што зімовая рыбалка – гэта цікавы і захапляльны занятак, і яны з задавальненнем удзельнічаюць у такіх спаборніцтвах.
Час праляцеў незаўважна. Роўна а 12 гадзіне прагучаў свісток. І суддзі ўсіх сектараў падыходзілі да кожнага ўдзельніка чэмпіянату і складвалі рыбу ў прамаркіраваныя пакеты. А затым пачаўся самы адказны момант – яе ўзважванне. Вага злоўленай рыбы запісвалася ў пратакол і вагалася... ад 50 грамаў да 2 кілаграмаў 620 грамаў.
...Ізноў пастраенне каманд. Уладзімір Ахрамчук называе пераможцаў, уручае ім Ганаровыя граматы, медалі і прызы, зычыць новых удач на наступных спаборніцтвах. Пераможцамі і прызёрамі сталі каманды філіяла «Крупскае УМГ ААТ «Газпрам трансгаз Беларусь»: І месца – УМГ № 1 у складзе Віталія Рапіцкага, Мікалая Азрэлева, Дзмітрыя Каравая (агульная вага ўлову 5 кг 790 г); ІІ месца – УМГ № 3 у складзе Аляксандра Арлова, Міхаіла Рабцава, Аляксея Малашчанкі (агульная вага ўлову 4 кг 40 г); ІІІ месца – УМГ № 2 у складзе Дзмітрыя Шайтанава, Дзяніса Рошчына і Сяргея Клюні (агульная вага ўлову 2 кг 580 г). У асабістым першынстве пераможцам стаў Віталь Рапіцкі, агульная вага злоўленай ім рыбы – 2 кг 620 г, у прызёрах аказаліся Мікалай Азрэлеў (вага ўлову 1 кг 750 г) і Міхаіл Рабцаў (вага ўлову 1 кг 720 г).
У табліцы спартакіяды сярод працоўных калектываў па падлёдавай лоўлі рыбы на зімнюю вудачку месцы размеркаваліся наступным чынам: І – Крупскае УМГ; ІІ – Крупскі РАУС (агульная вага ўлову 2 кг 520 г), ІІІ – Крупская ЦРБ (агульная вага ўлову 2 кг 330 г).
Пасля фотасесіі каманд-пераможцаў удзельнікі чэмпіянату выказалі сваё меркаванне: галоўнае не ўзнагароды, а атрыманыя зарад бадзёрасці і цудоўны настрой.
