– Іра вельмі прафесійна выступіла ў дуэце з Ларысай Грыбалёва ў горадзе Жодзіна ў Палацы культуры ААТ «БелАЗ» з легендарнай песняй «Чырвоная ружа», – расказвае кіраўнік студы «Жамчужына» эстраднай песні Маргарыта Еўсявіцкая. – Гэта быў добры, душэўны канцэрт, яркае свята таленавітых дзяцей! Кожны глядач атрымаў зарад станоўчых эмоцый ад папулярных песень Ларысы Грыбалёвай. Дзякуй велізарны ўсім, хто падтрымаў Ірыну ў інтэрнэт-галасаванні!
– Прафесійная сцэна! Гук! Апладысменты залы! Падтрымка самых блізкіх людзей – бацькоў! Пахвала ад любімага педагога па вакале Маргарыты Мікалаеўны! Незабыўныя эмоцыі! Дзеля гэтага варта жыць і развівацца, – дзеліцца сваімі ўражаннямі Ірына. – Паспяховы пачатак, удзячныя гледачы, прафесійнае суправаджэнне каманды, папулярныя артысты і, вядома ж, непаўторная Ларыса Грыбалёва. Як жа цудоўна, калі ты на сцэне з зоркамі эстрады, калі табе давяраюць і вераць у цябе, тваё натхненне і энтузіязм не згасаюць! Тады разумееш, што ты ідзеш у правільным кірунку і твой фокус увагі накіраваны толькі на лепшае!
– Праект Ларысы Грыбалёвай сімвалічна распачаўся ў Дзень абароны дзяцей, – расказвае падрабязнасці Маргарыта Еўсявіцкая. – Заяўкі на ўдзел у ім прыйшлі з розных куткоў Беларусі амаль ад 70 выканаўцаў, якіх пасля двух адборачных тураў засталося крыху больш за 30. Зараз спявачка выступае з імі канцэртным турам, прысвечаным Году малой радзімы. Чарговы канцэрт адбыўся ў Жодзіна, дзе і спявала наша Ірына. Апошні зводны гала-канцэрт плануецца ў снежні ў Мінскім гарадскім Палацы культуры, на якім выступяць лепшыя, у тым ліку і крупчанка Ірына Новікава.
Пажадаем юнай спявачцы натхнення і яркага выступлення!