Свае творы прывёз абстракцыяніст Сяргей Махнач – 40 незвычайных работ, прысвечаных нашай неверагоднай прыродзе, знакавым месцам у Беларусі, а таксама яркім падарожжам за мяжой.Захапляцца жывапісам Сяргей пачаў яшчэ ў дзяцінстве – шмат маляваў, вывучаў альбомы жывапісу з дамашняй бібліятэкі, ствараў свае малюнкі на аснове ўражанняў ад работ вядомых майстроў.
Але прафесійна пайшоў па іншай сцяжыне. Скончыў юрыдычны факультэт Беларускага дзяржаўнага ўніверсітэта. Пазней атрымаў дадатковую адукацыю ў галіне менеджменту. Зараз працуе менеджарам у сферы інфармацыйных тэхналогій.
Пэўны час у творчасці Сяргея быў перапынак. Штуршком да аднаўлення стала камандзіроўка ў ЗША, падчас якой ён змог наведаць Музей мастацтваў у Філадэльфіі і ўбачыць арыгіналы карцін блізкіх яму аўтараў: Поля Сезана, Вінцэнта Ван Гога і іншых вядомых майстроў.
Аўтар працуе ў жанрах пейзажу, нацюрморта. Асноўныя тэхнікі – жывапіс алеем, акрыл, акварэль. Як правіла, работам неўласцівы выражаны рэалізм, іх у большай ступені характарызуе нечаканасць сюжэтаў, а часам і некалькі містычны настрой. Аўтар не баіцца эксперыментаваць з колерам, ствараць цікавыя вобразы, якія падахвочваюць да разважання, сузірання.
Сергей Махнач прымае актыўны ўдзел у выставах жывапісу і графікі ў Мінску, Барысаве, Светлагорску і іншых гарадах. Першая персанальная выстава адбылася ў лістападзе 2019 г. у мастацкай галерэі «ARTквартал» Барысаўскай цэнтральнай раённай бібліятэкі імя І.Х. Каладзеева.
Пазнаёміцца з выставай можна да 30 студзеня 2021 г. Не прапусціце!
Хрысціна ЖУКАВА, навуковы супрацоўнік Крупскай мастацкай галерэі імя Б.У. Аракчэева.
Фота галерэі.
Крупская ЦРБ информирует о возможности получить консультацию врача общей практики на базе УЗ «Крупская ЦРБ» 27 ноября. 
