– Паэт, публіцыст, перакладчык, літаратуразнаўца, Максім Багдановіч уваходзіць у нашу свядомасць з першых школьных чытанняў і застаецца на ўсё жыццё як сімвал адданай любові да Радзімы, – падкрэсліла Хрысціна Жукава.
Сапраўды, радкі «і тчэ, забыўшыся, рука заміж персідскага ўзора цвяток радзімы васілька», «зорка Венера ўзышла над зямлёю, светлыя згадкі з сабой прывяла», «б’ецца, уецца шпаркі, лёгкі, сінякрылы матылёк» ведае кожны. Бо вершы Максіма Багдановіча – сапраўдныя шэдэўры.
Навуковы супрацоўнік паведаміла школьнікам аб творчай дзейнасці паэта, жыццё якога было хоць і кароткім, але плённым. Падчас размовы на экране ўзнікалі фотаздымкі і кадры з жыцця паэта. У гэты дзень гучалі запісы песень на словы Максіма Багдановіча ў выкананні ансамбля «Песняры». Затым школьнікі мелі магчымасць праверыць свае веды па творчасці Багдановіча ў літаратурнай віктарыне. А жадаючыя чыталі любімыя вершы паэта. Напрыканцы кожнаму ўдзельніку – памятныя падарункі.
– З творчасцю Максіма Багдановіча нас пазнаёміла настаўнік беларускай мовы і літаратуры Аксана Уладзіміраўна Бялаўская, – дзеліцца ўражаннямі навучэнка Вольга Вусік. – Мой любімы верш «Зорка Венера». Ён кранае мяне да глыбіні душы. І сёння я не ўпусціла магчымасць пачытаць яго. Якія глыбокія, шчырыя, узнёслыя пачуцці адлюстраваў аўтар! Верш пранізаны асаблівай цеплынёй і задушэўнасцю.
Дарэчы, для вучняў СШ № 1 наведваць літаратурна-музычныя гасцёўні ўвайшло ўжо ў добрую традыцыю. Творчае супрацоўніцтва з гісторыка-краязнаўчым музеем і мастацкай галерэяй доўжыцца ўжо некалькі гадоў.
– Прымусіць любіць Радзіму, прыроду нельга, але дапамагчы можна, – кажа настаўніца Аксана Бялаўская. – Такія сустрэчы дапамагаюць вучням глыбей унікнуць у гісторыю свайго краю, паўней адчуць любоў да роднай старонкі. А таксама садзейнічаюць больш пашыранаму засваенню школьнага матэрыялу, звязанага з творчасцю пісьменнікаў. Вучні даведваюцца пра іх як пра асобу, грамадзяніна і чалавека. Літаратурныя вечары фарміруюць у школьнікаў павагу да гістарычнай і літаратурнай спадчыны.
Іна ГАРА.