Трэба адзначыць, што пісьменнік ужо бываў у Крупках некалькі гадоў таму. Тады ён знаёміў сваіх маленькіх чытачоў з кнігай «Ни секунды тишины». На гэты раз Дзмітрый Юртаеў прывёз презентацыю новай кнігі на беларускай мове «Казкі ката Грамапападомуса». Яна павінна выйсці ў свет у красавіку гэтага года. Дзяўчынкам і хлопчыкам пашчасціла пазнаёміцца і з цікавым чалавекам – паэтам, празаікам, перакладчыкам, мастаком, дызайнерам, пераможцам і лаўрэатам некалькіх прэстыжных міжнародных конкурсаў, і з яго цікавай кнігай. Школьнікі ўбачалі яе ў электронным варыянце. Такая яркая і маляўнічая. Дарэчы, ілюстрацыі да кнігі рабіла знакамітая мастачка Аксана Аракчэева. Вершы, безумоўна, адразу падкупілі маленькіх чытачоў сваім выразным рытмам, лёгкім складам і тонкім пачуццём гумару. Дзецям спадабаліся гісторыі ката Грамапападомуса, якія здарыліся з ім і не толькі.
Асабліва парадавала дзяцей тое, што творы аўтара можна было не толькі паслухаць: кожны здолеў на некалькі хвілін пераўвасобіцца ў героя верша! Так, у галерэю ненадоўга «зазірнулі» велікан Шурум-Бурум, кацяняты Руды Хвосцік і Чорны Носік, летуценны Конік і цэлы шэраг лясных звяроў. Ганарыцца аўтар партрэтамі на вокладцы кнігі «Ни секунды тишины». Хоць дзеці, бачачы іх, гучна і залівіста смяюцца. Чаму? Вазьміце ў рукі гэтую кніжку, і ўсё зразумееце самі.
Дзмітрый Юртаеў настолькі ўжываўся ў ролю любога героя верша, што персанажы літаральна ажывалі ў гэты дзень. Адгадваючы рэбусы, загадкі, паўтараючы вершаваныя радкі, дзеці хорам прамаўлялі творы аўтара. Госці ладзілі сцэнкі, на хаду прыдумвалі рыфмаваныя экспромты.
Закладкі і календары выйгралі ўсе ў насычаных эмоцыямі конкурсах. Як і чакалася, выступленне прайшло на ўра: дзеці былі ў захапленні ад смелых ідэй аўтара. Пасля прэзентацыі вучні змаглі набыць зборнік вершаў з аўтографам, а некаторым госць намаляваў у кнізе партрэт.
Гледзячы на гэтага жартаўніка, здаецца, быццам усё выступленне – імправізацыя, але, аказваецца, Дзмітрый распрацаваў дзіцячыя праграмы, з якімі ён ездзіць па свеце і знаёміць са сваёй творчасцю дзяцей і дарослых. Беларусь, Расія, Украіна, Літва, Польшча, Германія – і гэта яшчэ не поўны пералік краін зямлі, якія ўжо ведаюць аб беларускім творцы.
Фота Аляксандра БУДЗЬКО.