Захаванне каштоўных матэрыяльных і духоўных здабыткаў, назапашаных стагоддзямі нашымі продкамі, асабліва актуальна ў Год гістарычнай памяці. Сімвалічна, што сёлета мы адзначалі 1030-годдзе ўсталявання Праваслаўя на беларускіх землях. Захаванне духоўных багаццяў – гэта не проста праца. Гэта хараство, якім напаўняецца ўнутраны свет чалавека. Прыемна, што на нашай Крупскай зямлі з пашанай захоўваюцца духоўныя здабыткі мінуўшчыны. Аб гэтым сведчыць новаасвечаны храм у вёсцы Грыцкавічы, які не так даўно адкрыўся пасля рамонту.
Храм Праабражэння Гасподня мае вялікую гісторыю. Гэта адзін са старажытных храмаў. Складаны лёс быў у царквы. Як распавялі ў сястрыцтве пры храме свяціцеля Мікалая Цудатворцы, храм пабудаваны ў 1622 годзе. Толькі ўявіце сабе – святыні 400 гадоў! Дзякуючы таму, што храм знаходзіцца на ўзвышшы за вёскай, яму пашчасціла ўцалець падчас пажару ў 1913 годзе. Дарэчы, у тым пажары згарэла ўся вёска. У розныя часы царква то працавала, то была зачынена. Нейкі час храм быў перабудаваны ў амбар пад захоўванне зерня...
У 2021 годзе экспертная камісія дала заключэнне, што храм падлягае рамонту і рэстаўрацыі. На выкананне работ Мітрапаліт Мінскі і Заслаўскі Веніямін, Патрыяршы Экзарх усяе Беларусі благаславіў благачыннага Крупскай акругі протаіерэя Мікалая Гміра. Асноўныя сродкі прадстаўлены з Епархіяльнага ўпраўлення Мітрапалітам Веніямінам. Астатнюю частку выдзеліў Мікалай Гмір. На працягу некалькіх месяцаў працавала рамонтна-рэстаўрацыйная брыгада – вялася вялікая будаўнічая праца. Арганізацыі і прадпрыемствы раёна, мясцовыя жыхары аказалі дабрачынную дапамогу. Аб гэтым нам расказала старшыня Крупскага раённага Савета дэпутатаў Алена Дамаронак.
– Вялікая праца была зроблена па захаванні мясцовай святыні, – кажа Алена Аляксандраўна. – Прыхінуліся ўсе нераўнадушныя. Працаўнікі Крупскага лясгаса і Халопеніцкага сельвыканкама займаліся вырубкай і спілаваннем дрэў і кустоў. Ураджэнец вёскі Дудзінка Міхаіл Валаховіч ахвяраваў матэрыял для агароджы тэрыторыі храма. А ўстанавіла агароджу Крупскае УМГ. Таварыства з абмежаванай адказнасцю «Амкадор-Можа» вырабіла вароты. Устаноўкай варот займаўся Халопеніцкі вытворчы ўчастак ААТ «Здравушка-мілк». Каб прыхаджанам зручна было ісці да храма, працаўнікі філіяла КУП «Мінскаблдарбуд»-«ДРБУ-164» пабудавалі тратуарную дарожку. У добраўпарадкаванні прымалі ўдзел КУП «Жылцеплабуд», ААТ «Кляновічы», ДЭУ № 69. Ахвотна адазваліся і мясцовыя жыхары – выконвалі касметычныя работы.
Няхай жыве наша духоўнае багацце вечна. А храм Праабражэння Гасподня будзе невычэрпнай крыніцай духоўнай моцы.
Іна ГАРА.