Жыхары Красноўкі адзначылі свята вёскі, якое адбылося 25 верасня. Шчыра і сардэчна ўсіх прысутных, а на свята сабраліся не толькі красноўцы, а і жыхары бліжэйшых населеных пунктаў, віталі старшыня Бобрскага сельвыканкама Уладзімір Загорскі і дырэктар ААТ “Кляновічы” Уладзімір Багачоў. Для ўшанавання на імправізаваную сцэну запрашаліся карэнныя жыхары Красноўкі – Валянціна Каліноўская, якая на працягу 25 гадоў працавала брыгадзірам комплекснай брыгады саўгаса “Бобр”; Васіль і Зінаіда Каравацкія – былы брыгадзір, старшыня Боборскага сельвыканкама, начальнік аховы вайсковай часці і даглядчыца цялят, якія выхавалі пяцёра дзяцей; Вольга Бязмозгая, якая да выхаду на пенсію працавала ў паляводчай брыгадзе.
Віншаванні і самыя шчырыя пажаданні атрымала і маладая сям’я – Андрэй і Наталля Машковы, а таксама жыхары суседняй вёскі Навесы – Надзея Шынкарова, Ніна Лукашэвіч, Ядзвіга Багданоўская, Валянціна Шапавалава, якія працавалі ў свой час у саўгасе “Бобр”.
Доўга ў той дзень над Красноўкай луналі песні, якія дарыў вяскоўцам народны ансамбль народнай песні “Жывіца”. Спадабаліся ўсім музычныя нумары ў выкананні Віялеты Галкінай, маналогі, якія чытала Галіна Чарнышова, выступленне ансамбля цыганскай песні “Талісман”. Вяскоўцы вельмі ўдзячны ўсім за прыезд у іх родную Красноўку.
