У Крупскай раённай бібліятэцы імя Янкі Купалы для чытачоў наладзілі выставу, прысвечаную трыадзінай сімволіцы.
– Выстава пачынаецца Канстытуцыяй Рэспублікі Беларусь, – распавядае дырэктар бібліятэкі Наталля Купрыянава. – Бо менавіта артыкул 19 вызначае, што сімваламі Рэспублікі Беларусь як суверэннай дзяржавы з’яўляюцца яе Дзяржаўны сцяг, Дзяржаўны герб і Дзяржаўны гімн. Сімвалы краіны прадстаўлены на выставачнай экспазіцыі. Для ўсведамлення ролі і значнасці дзяржаўных сімвалаў вучоныя, грамадскія і дзяржаўныя дзеячы разглядаюць іх у некалькіх аспектах – гістарычным, сацыяльным, палітычным, ідэалагічным, прававым і мастацка-эстэтычным. Дзяржаўныя сцяг і герб размешчаны ў гарадах і пасёлках, на плошчах і будынках, дзіцячых установах, на сельскагаспадарчай тэхніцы і іншых. Тым самым мы аддаём павагу роднаму дому, месцу, дзе нарадзіліся, вучымся і працуем, у цэлым сваёй краіне.