У Крупскай мастацкай галерэі імя Барыса Аракчэева дзейнічае выстава “З прыродай зліўшыся душой…”. Сямнаццаць карцін экспануецца ў вялікай зале галерэі.Гэта работы знакамітых майстроў, членаў Саюза мастакоў Беларусі: Аксаны Аракчэевай, Уладзіміра Уродніча, Віктара Барабанцава, Мікалая Мішчанкі, а таксама нашых самадзейных мастакоў-землякоў: Аляксея Гаміна, Уладзіміра Салаўя, Фёдара Сарокіна, Алега Пручкоўскага і Сурэна Навасардзяна.
Карціны розныя па тэхніцы выканання, каляровай гаме, па сваім змесце, аднак усе яны сведчаць пра багатую прыродную палітру нашага роднага крупскага краю. Вабіць позірк веліч нашых лясоў і глыбінная сінява рэк і азёр, клічуць удалеч шырокая звілістая дарога і вузкая сцяжынка, бачыш імклівы бег аблокаў і спакойны позірк казулі…
Праходзіш па зале, знаёмішся з работамі і разумееш: няма таго вобраза, апетага Якубам Коласам, які б не знайшоў свайго адлюстравання на карцінах нашай выставы. Многія куточкі роднага крупскага краю з лёгкасцю пазнаеш, нягледзячы на тое, што сёння адбыліся змены ў пейзажах, якія 5, 10 і нават 20 гадоў таму назад кранулі душу мастака і натхнілі яго на напісанне карціны.
Запрашае ў госці да сябе наша даўняя знаёмая – мясціна Лебартова (работы Уладзіміра Уродніча “Урочышча Лебартова” (2012) і Сурэна Навасардзяна “Лебартова”), абяцае добры адпачынак жамчужына Крупшчыны – возера Сялява (Аляксей Гамін “На возеры Сялява”), заварожвае сваёй цішынёй і спакоем бераг крупскага возера (палатно Уладзіміра Салаўя “Возера. Крупкі” (2010) і кліча ўдалеч за сабой рака Нача (работы Аляксея Гаміна “Рака Нача восенню” і “Рака Нача”)…
На жаль, гаворачы словамі Міколы Хведаровіча, “часта, так часта бывае, што мы ў сумятлівым жыцці мінаем і не заўважаем красу сваіх родных мясцін”.
Мастацкая галерэя запрашае крупчан наведаць выставу “З прыродай зліўшыся душой”, якая будзе доўжыцца да 10 лістапада бягучага года. Несумненна, кожны аматар жывапісу на свой густ знойдзе карціну або некалькі работ, што паклічуць яго на прыроду, каб увачавідкі палюбавацца роднымі краявідамі.
Таццяна БОНДАР, навуковы супрацоўнік Крупскай мастацкай галерэі імя Барыса Аракчэева.
