Выстава карцін нашага земляка працуе ў Крупскай мастацкай галерэі імя Б.У. Аракчэева. На ўрачыстым адкрыцці прысутнічалі госці, родныя і блізкія людзі аўтара.
– З’явіўся я на свет у вёсцы сярод балот – Запуткі, – распавядае Уладзімір Красоўскі. – Маленства і юнацтва прайшло ў Худаўцах. Непаўторная прырода, таямнічыя краявіды, цікавыя людзі-сяляне, мясцовы храм Раства Прасвятой Багародзіцы аказалі значны ўплыў на маё мастацкае станаўленне. Першы нацюрморт я напісаў яшчэ ў школе. Вучыўся ў мастацкім вучылішчы ў Адэсе. У гэты час стварыў копіі «Залатая восень» Ісака Левітана, «Дзяўчынка з персікамі» Валянціна Сярова. Настаўнікам быў Мікалай Арцем’евіч Паўлюк, які многаму навучыў.
На выставе «Код жыцця» прадстаўлена 36 работ аўтара. Пейзажы, партрэты, нацюрморты – яркія фарбы адлюстроўваюць душэўны стан мастака.
– Натхняюць на творчасць вобразы малой радзімы, – тлумачыць Уладзімір Красоўскі. – Бацькоўская хата – гэта мой Сусвет. Тут я чэрпаю сілы, тут вяду гамонку са сваімі продкамі. У вёсцы зусім іншая энергетыка, у горадзе такой няма. Увогуле, Бацькаўшчыну трэба адчуваць, словамі гэтыя пачуцці не перадаць, хіба што на карціне. Бліжэй за ўсё мне філасофская і духоўная тэматыка. Упэўнены, калі прыходзіць ідэя, то адразу трэба маляваць. Тады і карціна ствараецца, як кажуць, адным махам. Ёсць сярод мастакоў у мяне і куміры. Больш за ўсё адухаўляе творчасць Айвазоўскага, Куінджы.
– Мы ганарымся нашым таленавітым земляком, – дзеліцца навуковы супрацоўнік галерэі Хрысціна Жукава. – Усе карціны розныя. Кожны раз мастак імкнецца паказаць нешта своеасаблівае, перадае нам гукі прыроды, дапамагае адчуць прыгажосць кветак, лугоў і траў.
Уладзімір Красоўскі падзякаваў супрацоўнікам галерэі і гасцям выставы за ўвагу, пажадаў моцнага здароўя на доўгія гады. Мастаку – падарунак ад галерэі.
Фота Святланы ГРЫНЬ.