Ля стэнда, дзе размяшчалася выстава сродкаў масавай інфармацыі Міншчыны, было заўсёды шматлюдна. Праграма распісана літаральна па гадзінах, у кожнай рэдакцыі – свой час для прэзентацыі. Менавіта таму ля экспазіцыі сталічнага рэгіёна ніколі не было ціха, а наведвальнікі ахвотна падыходзілі, знаёміліся, глядзелі і нават уключаліся ў дзеі.Падтрымалі «Крупскі веснік» падчас прэзентацыі салісты народнага ансамбля народнай песні «Крупчанка». Мы прыехалі на выставу раніцай 13 мая якраз да яе адкрыцця. Павільёны толькі пачыналі працаваць. І тут было важна прыцягнуць увагу гасцей, каб яны падыходзілі менавіта да стэнда Міншчыны. Нашы артысты справіліся з гэтай задачай на выдатна. Вітанні, запрашэнні і пажаданні на роднай беларускай мове гучна і з настроем узляцелі пад купал Нацыянальнага выставачнага цэнтра «БелЭкспа». Людзі з цікавасцю падыходзілі, каб паслухаць, паглядзець, фатаграфавалі, здымалі відэа і прытанцоўвалі ў такт вясёлым беларускім народным песням.
Сёлета ў юбілейнай выставе бралі ўдзел вядучыя дзяржаўныя рэспубліканскія масава-палітычныя выданні, тэлеканалы, рэгіянальныя СМІ, галіновыя, адукацыйныя, дзіцячыя, літаратурна-мастацкія выданні FM-станцыі, прадстаўнікі сродкаў масавай інфармацыі Расіі, Саюзнай дзяржавы, СНД, Кітая, Венесуэлы, Кубы, іншых краін. Міністр інфармацыі Беларусі Лілія Ананіч адзначыла, што мінулы год быў знакамітым на падзеі, гэта быў год глыбокай творчасці. І сродкі масавай інфармацыі праўдзіва, цікава, прафесійна адлюстроўвалі ўсю разнастайнасць жыцця нашай краіны.
Спецыялізаваная выстава «СМІ ў Беларусі» сапраўды стала дыялогавай пляцоўкай, дзе не проста дэманстраваліся дасягненні ў медыйнай сферы. Чатыры дні журналісцкае асяроддзе ў нефармальнай абстаноўцы дзялілася ідэямі, творчым вопытам, выпрацоўваліся новыя падыходы ў рабоце з інфармацыяй, новыя шляхі развіцця інфармацыйнай прасторы Беларусі. Шмат гаварылася пра друкаваныя СМІ, пра аператыўнасць распаўсюджвання інфармацыі праз усе каналы камунікацыі, у першую чаргу мультымедыйныя.
А таксама гэта было свята, далучыцца да якога мог кожны. Друкаваныя і электронныя СМІ мелі магчымасць заявіць пра сябе як мага гучней. Абмежаванняў творчай фантазіі не было. Рэдакцыя нашага «Крупскага весніка» падрыхтавала відэафільм, які расказваў пра газету, пра тое, як працуе творчы калектыў, а таксама прапанавала гасцям разнастайную прэзентацыйную прадукцыю. Так што, зараз у многіх кутках краіны, і не толькі, людзям будуць нагадваць пра Крупскі край і раённую газету календарыкі, буклеты і блакноты з нашым лагатыпам. А ўражанні ад выступлення народнага ансамбля народнай песні «Крупчанка» падмацуюць тое, што Крупшчына – сапраўды край таленавітых, творчых, а гэта значыць добрых людзей.
