Як вядома, з 1 красавіка па 30 мая ва ўсіх рыбалоўных угоддзях Беларусі дзейнічала забарона на лоўлю рыбы. І мінулыя выхадныя можна было лічыць адкрыццём летняга сезона рыбалоўства. 

– Прафілактычнае мерапрыемства, якое мы праводзім сёння, накіравана на папярэджанне і спыненне парушэнняў прыродаахоўнага заканадаўства, – расказваў па дарозе Уладзімір Віктаравіч. – Мы павінны пракантраляваць, ці забруджваюцца або ці засмечваюцца рыбалоўныя ўгоддзі, у нашым выпадку возера Сялява, дзе ў прыбярэжнай паласе воднага аб’екта знаходзяцца аўтатранспартныя сродкі, ці парушаюцца патрабаванні Правіл вядзення рыбалоўнай гаспадаркі і рыбалоўства пры аматарскай рыбнай лоўлі. Задача нашай групы – правесці адпрацоўку Сялявы на вадзе, а другой групай будзе ахоплена тэрыторыя, прылеглая да гэтага вадаёма.

Рэйдавыя мерапрыемствы пачаліся ад вёскі Прошыка. На адкрытай паляне непадалёку ад парка ўжо стаялі палаткі, а аматары падводнай лоўлі рыбы (як аказалася ў далейшым, яны прыехалі з Барысава), збіралі сваю амуніцыю, каб пайсці ў ваду. Дзяржінспектар, праверыўшы дакументы, выявіў, што білет на падводную рыбалку датаваны 2015 годам, і зрабіў заўвагу: калі яны будуць незаконна рыбачыць, ім пагражае штраф. Гэта заўвага была прынята ў штыкі, аднак, як кажуць, закон суровы, але ён закон. Папярэджанне атрымалі і два рыбакі, што з лодкі лавілі рыбу без пуцёўкі. Хлопцы адказалі, што зараз жа сходзяць, бо база заказніка знаходзіцца не так і далёка, і купяць пуцёўкі. 

На першы раз зноў жа быў папярэджаны і аўтааматар, які паставіў аўтамашыну прама на самым беразе, хаця, прызнаўся, што ведаў аб стаянцы да 30 метраў па гарызанталі ад берагавой лініі. Забягаючы наперад, зазначым: такія парушэнні дапускаліся многімі адпачываючымі, што прыехалі на возера на асабістым транспарце. Пасля заўвагі ўсе тут жа адганялі машыны на пэўную адлегласць.

І яшчэ адна бяда. На вадаёме паўсюдна бачны чырвоныя кружкі, на якія ловяць шчупака. Але справа ў тым, што на гэтых кружках павінны стаяць прозвішча, імя, імя па бацьку яго ўладальніка. І варта заўважыць, што гэта зроблена толькі на лічаных такіх прыладах рыбалоўства. У асобных жа выпадках можна было ўбачыць ініцыялы, тыпу «ВВС», «РВИ», ці нават «Лёлик, г. Минск»... Незаконна пастаўленыя кружкі выцягваліся з вады і складваліся ў лодку. І да канца рэйду іх аказалася амаль мяшок. 

Дзесьці каля Янаўшчыны былі выцягнуты рэшткі рыбалоўнай сеткі, заблытанай у траве, а каля Старожышча – толькі што пастаўленая сетка метраў на 50.

Нельга не сказаць і аб падводных рыбаловах. Відавочна, што дзяржінспектару прыемна было весці размову з тымі, у каго ўсе патрэбныя дакументы ў парадку, як, напрыклад, з групай з чатырох мужчын з Магілёва. На Сяляву яны прыехалі ўпершыню, і іх, бясспрэчна, цікавілі найбольш «улоўныя» месцы. І Уладзімір Віктаравіч падказаў, куды браць кірунак. Прэтэнзіі прад’яўляліся тым падводным рыбаловам, якія не абазначалі сябе буйкамі, якія былі на лодках з маторам больш 15-ці конскіх сіл, выкарыстанне якіх забаронена ў заказніку рэспубліканскага значэння. Зацікавілі членаў рэйдавай і два падводныя рыбаловы з Мінска. На пытанне аб пуцёўках, тыя адказалі, што ўсё ёсць, знаходзяцца на беразе ў машыне. Спачатку ім паверылі, толькі спыталі марку і номер аўтамашыны. На ўсякі выпадак, звязаліся з групай, якая працавала на прылеглай да возера тэрыторыі. І, як аказалася, не дарэмна: не было ў гэтых хлопцаў ніякіх дакументаў. На двух парушальнікаў складзены адміністрацыйны пратакол аб незаконнай рыбалцы. 

Закончыць жа хочацца на мажорнай ноце. Пагадзіцеся, што кожнаму аматару рыбалкі хаця б адзін раз ды ўсміхалася ўдача засекчы на вудачку або спінінг буйнога ляшча, акуня ці шчупака. Помніце адчуванне, калі вудзілішча гнецца ў дугу, нацягнутая леска звініць, ад празмернасці пачуццяў дрыжаць рукі?.. У гэты момант у галаве толькі адна думка – правільна вывесці здабычу і забраць яе падсакам у лодку. Хочаце адчуць падобны драйв? Тады адпраўляйцеся на Сяляву! Гэта адно з чысцейшых азёр Беларусі. А для рыбака яно – увасобленая мара. Таму і едуць на жамчужыну Крупшчыны амаль з усіх гарадоў нашай краіны, і не толькі.

РЭЙДАВАЯ БРЫГАДА: Уладзімір КАРОЛЬ, дзяржаўны інспектар Барысаўскай міжраённай інспекцыі аховы жывёльнага і расліннага свету; Валерый КАРАБУН, Максім ЗАПЕКІН, вадзіцелі міжраённай інспекцыі; Таццяна ТАЛКАЧОВА, адказны сакратар рэдакцыі раённай газеты «Крупскі веснік».