За гэтае дзесяцігоддзе адбылося пяць такіх урачыстасцяў. І кожны раз гучаць са сцэны ўспаміны аб велічным мінулым пасёлка, аб значных датах яго развіцця і станаўлення. Кожны раз ад усёй душы віншуюць жыхароў Халопеніч з іх асабістымі датамі, дасягненнямі, адметнымі падзеямі ў жыцці. Не стала выключэннем і сёлетняе свята.

Старшыня Халопеніцкага сельвыканкама Андрэй Вакулаў цёпла і сардэчна павіншаваў усіх прысутных са святам, якое ўжо стала добрай традыцыяй, пажадаў, каб Халопенічы з кожным годам станавіліся яшчэ прыгажэйшымі, каб усе дамы былі добраўпарадкаванымі і прывабнымі, а яго жыхары шчырай і натхнёнай працай славілі сваю малую радзіму.

Вядучыя свята нагадалі, што паслядоўнасць гістарычных змяненняў і здзяйсненняў мястэчка многія ведаюць, дзякуючы сустрэчам на «Халопеніцкім карагодзе». Але пры знаёмстве з дакументальнымі матэрыяламі зноў і зноў сустракаецца нешта новае і яшчэ невядомае. Так, 250 гадоў назад уладальнікам Халопенічаў стаў Іахім Храптовіч. Ён значна ўзняў гаспадарку ў Халопеніцкім маёнтку, які ў той час пачынае называцца Халопеніцкім графствам. Як сведчыць інвентар за 1777 год, ва ўсім Халопеніцкім графстве было 1 102 двары чыншавых сялян, а ў мястэчку Халопенічы – 25 хрысціянскіх і 77 яўрэйскіх двароў (яшчэ 27 пуставалі). Агульная колькасць двароў – 102. 

Як бачым, калісьці гэты населены пункт меў статус мястэчка, графства, пасёлка, з 17 ліпеня 1924 года – раённага цэнтра, з 27 верасня 1938 года – гарадскога пасёлка. Згодна статыстычных дадзеных, на пачатак студзеня бягучага года ў Халопенічах налічваецца 637 гаспадарак і 1 543 жыхары, якія пражываюць на 24 вуліцах і 3 завулках.

Шмат знакамітых людзей нарадзіла і ўзгадавала халопеніцкая зямля. Чырвоным радком у гісторыю пасёлка ўпісана прозвішча, якое вядома кожнаму і ўвекавечана ўдзячнымі нашчадкамі, – Багдановічы. Менавіта ў мястэчку Халопенічы ў сям’і былога прыгоннага з дваравых пана Лапы 20 сакавіка 1862 года нарадзіўся Адам Ягоравіч Багдановіч. У 1868 годзе паступіў у школу, а пасля яе заканчэння стаў памочнікам настаўніка ў гэтай жа Халопеніцкай школе. Стаўшы выдатным вучоным-этнографам і жывучы ў Расіі, ён праз усё жыццё пранёс вялікую любоў да сваёй Радзімы – Беларусі. 

Сёлетні год, як вядома, аб’яўлены Годам культуры. І адной са значных падзей яго з’яўляецца 125-я гадавіна з дня нараджэння вялікага беларускага паэта Максіма Багдановіча. З 1972 года яго імя носіць дзяржаўная ўстанова «Халопеніцкая сярэдняя школа». Да месца адзначыць, што школа ажыццявіла свой першы выпуск 80 гадоў таму – у 1936 годзе. З таго часу яна дала пуцёўку ў жыццё не аднаму пакаленню. У ліку выпускнікоў – 49 залатых медалістаў і 64 сярэбраных.

55 гадоў назад у Халопенічах пачала працаваць яшчэ адна навучальная ўстанова – школа-інтэрнат, якая з цягам часу была пераўтворана ў дзіцячы дом, затым – у прытулак. Сёння на базе былой установы працуюць раённы дзіцячы сацыяльны прытулак, дзіцячы сад, цэнтр творчасці дзяцей і моладзі. Роўна 45 гадоў таму першых сваіх вучняў прыняла Халопеніцкая дзіцячая музычная школа.

Асобна было расказана пра ветэранаў і ўдзельнікаў Вялікай Айчыннай вайны, праз якую ім давялося прайсці і вярнуцца з перамогай. На жаль, іх рады радзеюць з кожным годам, і на сённяшні дзень у Халопенічах жывуць толькі тры ветэраны – Роза Андрэеўна Баярына, Мікалай Сямёнавіч Гацура і Уладзімір Адамавіч Скалубовіч. Не былі забыты і 14 сем’яў перасяленцаў з Гомельшчыны, якія былі вымушаны пакінуць свае родныя мясціны пасля чарнобыльскай аварыі, і якія 30 гадоў назад сталі паўнапраўнымі жыхарамі Халопеніч.

Цікавым было знаёмства з землякамі, чые знамянальныя даты альбо юбілеі супалі з сёлетнім годам. Самыя цёплыя і шчырыя вітанні прымалі Леанід Васільевіч і Ганна Паўлаўна Плаксёнкі, якія разам пражылі ўжо 61 год, а таксама самая маладая сям’я – Сяргея і Наталлі Жылінскіх, шлюб якіх зарэгістраваны 23 ліпеня. На сцэну ўзнімалася і адна з мнагадзетных сем’яў пасёлка, гэта сям’я Віктара і Алены Гліннік, у якой трое дзяцей – Анастасія, Таццяна і Максімка. Самым юным жыхаром Халопеніч стаў Аляксей Рудэнка. Віншаванні з гэтай нагоды прымалі яго бацькі Леанід і Святлана, і яго старшая сястрычка.

На свяце былі падведзены і вынікі агляду на лепшае домаўладанне. За званне «Сядзіба ўзорнага парадку-2016» падарунак атрымалі Віктар і Зінаіда Богданы з вуліцы Паўночнай. А пераможцай раённага агляду-конкурсу «Лепшы ветэранскі падворак» стала Валянціна Ігнатаўна Воранава, якой таксама быў уручаны падарунак і ў адрас якой гучалі самыя сардэчныя віншаванні і пажаданні. У намінацыі «Лепшае прадпрыемства» пераможцам прызнаны Халопеніцкі ўчастак КУП «Жылцеплабуд» (выконваючы абавязкі кіраўніка Лілія Ермаковіч).

Святочны настрой стваралі ўсім як мясцовыя самадзейныя артысты, вучні школы, так і вакальны ансамбль «Наша песня» Крупскага СДК. Халопеніцкі сельвыканкам і арганізацыйны камітэт падрыхтоўкі і правя-дзення «Халопеніцкага карагода» выказалі ўдзячнасць спонсарам, арганізатарам выстаў і экспазіцый і ўсім тым, хто садзейнічаў і дапамагаў ў арганізацыі і правядзенні свята.