У той лістападаўскі дзень ушанаванне прымалі кіраўнікі раённых структур, аддзелаў раённых сельгаспрадпрыемстваў, галін сельскагаспадарчага комплексу, кіраўнікі гаспадарак, іх намеснікі, галоўныя спецыялісты гаспадарак, работнікі аграпрамысловага комплексу і службаў, звязаных з забеспячэннем работы АПК.Гэта людзі, якія звязалі свой лёс з сельскай гаспадаркай, аддалі ёй частку свайго жыцця і ўнеслі значны ўклад у яе развіццё. Нездарма ж у народзе кажуць: хаця зерне і залатым родзіцца, але пераўтварыць яго ў золата без вялікіх намаганняў няпроста.
Са шчырымі словамі віншаванняў да ўдзельнікаў сустрэчы звярнуўся першы намеснік старшыні райвыканкама, начальнік упраўлення сельскай гаспадаркі і харчавання Міхаіл Радзько. Ён адзначыў, што ўсе прысутныя ў зале – гэта наша багацце, захавальнікі вопыту, традыцый, майстэрства. «Вам, ветэранам працы, чыімі намаганнямі ствараліся вытворчыя і перапрацоўчыя магутнасці, хто сёння перадае свой вопыт моладзі, – асаблівая падзяка, – гаварыў Міхаіл Яўгенавіч. – Менавіта ваша доблесная і самаадданая праца з’яўляецца прыкладам для пераймання».
Падчас свята вядучыя называлі прозвішчы былых кіраўнікоў, якія ўмелі павесці за сабой працоўныя калектывы на выкананне пастаўленых задач, клапаціліся аб людзях, стваралі дастойныя ўмовы для работы. Гэта Іосіф Станіслававіч Карчміт – вызвалены сакратар парткама саўгаса «Бобр», загадчык сельгасаддзела РК КПБ, першы намеснік старшыні РАПА, загадчык аддзела раслінаводства, другі сакратар РК КПБ, намеснік старшыні райвыканкама, старшыня планавай камісіі, Іван Іосіфавіч Горбач – старшыня калгаса імя Колесавай, галоўны ветурач раёна, старшыня калгаса імя Леніна, намеснік начальніка, начальнік упраўлення сельскай гаспадаркі і харчавання райвыканкама, Уладзімір Іванавіч Кохан – дырэктар саўгаса «Колас», начальнік упраўлення сельскай гаспадаркі, дырэктар эксперыментальнай базы «Эса», Павел Паўлавіч Пасека – старшыня саўгаса «Сялява», калгаса «Чырвоны Кастрычнік», загадчык зямельнага аддзела райвыканкама, старшыня раённага Савета дэпутатаў, Аляксандр Свірыдавіч Вычанкоў – дырэктар племсаўгаса «Слабада», дырэктар Халопеніцкага масласырзавода, Віктар Іванавіч Шчурко – старшыня калгаса імя Леніна, старшыня парткамісіі Крупскага РК КПБ, Васіль Станіслававіч Бярловіч – старшыня саўгаса «Абчуга», галоўны інжынер саўгаса «Бобр», Віктар Леанідавіч Пархоменка – старшыня калгаса «Праўда», начальнік «ПМК-196». Гэта іх стараннямі і намаганнямі ўзводзіліся не толькі вытворчыя аб’екты, але і магазіны, дзіцячыя сады, клубы, ФАПы, комплексна-прыёмныя пункты...
Прафесіяналізм, працавітасць, высокае пачуццё адказнасці за даручаны ўчастак работы ўласцівы галоўнаму аграному калгаса «Камунар», старшыні Нацкага сельсавета Галіне Аляксандраўне Акульчык, намесніку старшыні калгаса «Камунар», галоўнаму інжынеру калгаса імя Леніна Генадзю Іванавічу Кукіну, заатэхніку эксперыментальнай базы «Эса» Ірыне Баляславаўне Кохан.
Вядома, што без падрабязнага аналізу, строгага ўліку і справаздачнасці работа любога калектыву немагчыма. На сустрэчы прысутнічалі прадстаўнікі гэтай службы: Тамара Адамаўна Асіповіч – галоўны эканаміст саўгаса «Абчуга», бухгалтар-эканаміст райсельгастэхнікі, Ніна Антонаўна Кукіна – галоўны бухгалтар калгаса «Камунар», Галіна Афанасьеўна Шукюрава – бухгалтар калгаса імя Колесавай, бухгалтар райсельгастэхнікі, Таццяна Васільеўна Вычанкова – бухгалтар калгаса «Бальшавік», племсаўгаса «Слабада», інжынер па працы Халопеніцкага масласырзавода, Святлана Міхайлаўна Пархоменка – бухгалтар калгаса «Праўда», Ніна Іванаўна Бяліцкая – бухгалтар у калгасах Любанскага раёна, саўгаса «Лошніца», дыспетчар калгаса «Камунар».
Затым адбылося знаёмства з тымі, ад каго залежала вытворчасць і якасць прадукцыі жывёлагадоўлі: ветурачамі раёна Анатолем Ціханавічам Беспаяська і Людмілай Ціханаўнай Уноткінай, урачом-таксіколагам раённай ветлячэбніцы Вольгай Васільеўнай Горбач.
Не засталіся без увагі таксама кіраўнікі і работнікі раённых службаў, галін, упраўлення сельскай гаспадаркі. На сустрэчу запрашаліся Таццяна Іванаўна Навахрост – старшы эканаміст упраўлення сельскай гаспадаркі, загадчык аддзела сацзабеспячэння райвыканкама, Ганна Альфонаўна Камовіч – начальнік Крупскай дзяржнасенінспекцыі, Лілія Адрэеўна Глушчанка – даярка, заатэхнік калгаса імя Колесавай, галоўны заатэхнік Крупскага РАПА, намеснік начальніка, начальнік упраўлення сельскай гаспадаркі і харчавання, Валянціна Іванаўна Мініч – заатэхнік калгаса «Перамога», саўгаса «Якімаўка», дырэктар раённай племстанцыі, галоўны заатэхнік упраўлення сельскай гаспадаркі і харчавання, Ніна Мікалаеўна Хрыпач – галоўны заатэхнік саўгаса «Касянічы», селекцыянер-заатэхнік РАПА, галоўны заатэхнік упраўлення сельскай гаспадаркі. Асобна гаварылася пра Тамару Фядосаўну Гаўрыленкаву, якая працавала ў раёне з 1960 года. Займала пасады заатэхніка калгаса імя Варашылава Крупскага сельсавета, інспектара па закупу сельгаспрадукцыі. З 1963 года і да канца працоўнай дзейнасці была аграномам, заатэхнікам, старшым эканамістам па прагназаванні і планаванні ў жывёлагадоўлі ўпраўлення сельскай гаспадаркі.
Да месца адзначыць, што многія з названых ветэранаў працы ўзнагароджаны ордэнамі і медалямі. І падчас сустрэчы амаль усе яны бралі слова, успаміналі найбольш адметныя і цікавыя моманты са сваёй дзейнасці, прозвішчы сваіх працавітых камбайнераў і жывёлаводаў, дзякавалі арганізатараў за тое, што была знойдзена магчымасць сустрэцца разам.
