– Сімвалічна, што ўрачыстая цырымонія ўручэння пашпартоў маладым грамадзянам сёння праходзіць у раённым гісторыка-краязнаўчым музеі, – зазначыла першы сакратар раённага камітэта грамадскага аб’яднання «БРСМ» Ірына Дамаронак. – У музеі, які захоўвае свой аповед аб людзях і падзеях, што пакінулі след у гісторыі краіны і Крупскага раёна, гісторыі нашых землякоў, сапраўдных патрыётаў сваёй краіны, якія сваёй дзейнасцю, сілай і ўпартасцю прымнажалі славу і багацце Радзімы. Грамадзянін Рэспублікі Беларусь. Гэтыя словы кожны з нас вымаўляе з асаблівым гонарам і трапятаннем у сэрцы. Вялікая любоў да роднай Беларусі, павага да гісторыі і традыцый беларускага народа, вернасць гераічнаму подзвігу нашых дзядоў – вось што з’яўляецца сілай, якая аб’ядноўвае ўсіх грамадзян нашай рэспублікі.

Зразумелым было хваляванне дзесяці юных крупчан, якім вось-вось ва ўрачыстай абстаноўцы ўручаць пашпарты. Без сумнення, гэты дзень стаў для іх сапраўдным святам. А раздзяліць з маладымі людзьмі радасць падзеі прыйшлі ганаровыя госці: намеснік старшыні райвыканкама Андрэй Вараб’ёў, начальнік аддзялення па грамадзянству і міграцыі Крупскага РАУС, маёр міліцыі Павел Шышкевіч, ветэран Міністэрства ўнутраных спраў Рэспублікі Беларусь, начальнік аддзела па ахове дзяржаўных сакрэтаў і арганізацыі мабілізацыйнай работы райвыканкама Мікалай Зямніцкі, ветэран працы, былы начальнік аддзела ідэалагічнай работы райвыканкама, у 2010–2013 гадах старшыня раённага Савета дэпутатаў Ларыса Глінская, дырэктар Халопеніцкага філіяла ААТ «Здравушка-мілк», з 1991 па 1993 год – першы сакратар РК ЛКСМБ Васіль Гур, прадстаўнікі раённага выканаўчага камітэта, аддзела адукацыі, спорту і турызму.

– Дарагія рабяты! Глыбока сімвалічна, што свой галоўны дакумент вы атрымаеце менавіта ў Дзень Канстытуцыі. Ад імя старшыні раённага выканаўчага камітэта Ігара Часнака і ад сябе асабіста віншую вас з гэтай падзеяй. Мяркую, што атрыманне пашпарта – такое мерапрыемства, якое запамінаецца на ўсё жыццё, – гаварыў у прывітальным слове намеснік старшыні райвыканкама Андрэй Вараб’ёў. – У нашай краіне створаны ўсе неабходныя ўмовы для таго, каб асоба, каб маладыя людзі раскрываліся. Асноўны закон дае вам шмат правоў і гарантый, але ён замацоўвае за вамі абавязкі быць грамадзянінам. Беларусь і, у прыватнасці, Крупшчына заўсёды былі багатымі на таленты і самародкі. Вы – наша будучае і самае светлае сённяшняе. Ваш абавязак – умацоўваць асновы канстытуцыйнага ладу сваёй вучобай і сваёй працай. Здароўя вам, поспехаў ва ўсіх справах і пачынаннях, здзяйснення мар і надзей.

І вось для юных крупчан наступіў самы хвалюючы момант. Вядучая называе прозвішчы і пад апладысменты Андрэй Вараб’ёў уручае пашпарты і кнігі «Мы – грамадзяне Рэспублікі Беларусь» навучэнцы Крупскай раённай гімназіі Хрысціне Вяршковай, вучням СШ № 1 г. Крупкі – Алесе Марцынкевіч і Багдану Бражэўскаму, СШ № 3 – Лізавеце Салко і Наталлі Шчурко, СШ пасёлка Крупскага – Дзіяне Шавялёвай, Халопеніцкай СШ – Ксеніі Жылінскай і Мікіту Бажыну, Худавецкай СШ – Кірылу Шукайлу, Ухвальскай СШ – Сяргею Хвашчэўскаму.

Атрымаўшы пашпарты, юнакі і дзяўчаты ў словах клятвы ўрачыста паабяцалі ўмацоўваць аўтарытэт і добрае імя Беларусі, быць дастойнымі памяці тых беларусаў, якія аддалі свае жыцці за мір, усе свае сілы накіраваць на тое, каб садзейнічаць працвітанню роднай Беларусі.

Урачыстая цырымонія ўручэння пашпартоў закончылася, але ўсе прысутныя на ёй былі запрошаны ў залу Вялікай Айчыннай вайны для ўдзелу ў адкрытым дыялогу “Я – грамадзянін Рэспублікі Беларусь».

Уступнае слова сказала дырэктар раённага гісторыка-краязнаўчага музея Тамара Бальбот:

– Вельмі прыемна, што ў гэтым годзе нам выпаў гонар прыняць маладых людзей, якім ва ўрачыстай абстаноўцы ўручаны пашпарты. Сёння, дарагія рабяты, вы, можна сказаць, выраслі на цэлую галаву, вы сталі паўнапраўнымі грамадзянамі нашай краіны. І менавіта ад вас залежыць, якой яна будзе заўтра і ў наступныя гады. У кожнага з вас ёсць магчымасць рэалізаваць сябе – вучыцца, працаваць, займацца спортам, развіваць творчыя здольнасці. Жадаю вам натхнення і дасягнення ўсіх пастаўленых перад сабой мэт.

Падчас дыялогу двух пакаленняў кожны з запрошаных гасцей – Андрэй Вараб’ёў, Ларыса Глінская, Мікалай Зямніцкі, Васіль Гур і Павел Шышкевіч – вёў размову аб тым, з чаго пачынаецца Радзіма, што такое патрыятызм, дзяліўся сваімі ўспамінамі аб тым месцы, дзе ён нарадзіўся, дзе прайшло яго маленства, дзяцінства, юнацтва. Вельмі кранальна яны нагадвалі самыя шчаслівыя і памятныя моманты ў сваім жыцці, ахвотна адказвалі на пытанні маладых людзей, заклікалі іх не пакідаць сваю малую радзіму, а працаваць так, каб наша Крупшчына станавілася яшчэ прыгажэйшай.

Упэўнены, што ўсе прысутныя юнакі і дзяўчаты прачулі адказнасць, якая ўскладзена на іх з атрыманнем галоўнага дакумента. Тыя, у сваю чаргу, зазначылі, што цяпер яны дарослыя грамадзяне сваёй краіны, а значыць, на іх ляжыць абавязак вучыцца дзеля яе дабрабыту, уносіць уклад у яе далейшае працвітанне.