Атрымаўшы ў чарговы раз раённую газету «Крупскі веснік», праглядаю спачатку фотаздымкі, чытаю загалоўкі артыкулаў, а потым знаёмлюся з інфармацыяй. Пры гэтым пачынаю з таго, што, як кажуць, кінулася ў вочы. Думаю, што не адна я так раблю. Таму і вырашыла свой чарговы артыкул пачаць са знаёмства з чалавекам, які глядзіць на вас, паважаныя чытачы, са змешчанага фотаздымка.
І гэта не фатаграфія героя, а здымак выстаўленага ў мастацкай галерэі партрэта Галіі Фатыхавай, члена Саюза журналістаў і Саюза мастакоў Беларусі, вядомага беларускага мастацтвазнаўцы, цікавага субяседніка і проста чулага, спагадлівага чалавека. Прыгожая абаяльная жанчына паглядае з работы Віктара Барабанцава, члена Саюза мастакоў Беларусі, лаўрэата рэспубліканскіх прэмій. І аблічча гэтай інтэлігентнай жанчыны, і ўдумлівы позірк яе вачэй, і адлюстраваная на твары работа розуму, а таксама прывычна адведзеная ўбок рука – усё гаворыць пра ўпэўненага чалавека разумовай працы.
«Партрэт Галіі Фатыхавай» Віктара Барабанцава – адна з 17 работ партрэтнага жанру выставы «І ў профіль і ў анфас», што адкрыта з 20 студзеня бягучага года ў мастацкай галерэі. Кожны партрэт – частка творчага жыцця мастака, які прыклаў нямала намаганняў, каб створаны ім вобраз меў не толькі знешняе падабенства з чалавекам, але і перадаваў асаблівасці яго ўнутранага стану. Наведвальнікі галерэі не застаюцца абыякавымі да мастацтва пасля знаёмства з работамі такіх знакамітых мастакоў, як Аксана Аракчэева, Віктар Барабанцаў, пасля знаёмства з партрэтамі, напісанымі Алегам Гейхманам, Аляксеем Гаміным, Сяргеем Варламавым, Сурэнам Навасардзянам… Пройдзешся па зале, у якой выстаўлены партрэты розных людзей, маладых і сталага ўзросту, знаёмых і незнаёмых табе, і нібыта пагаворыш з Марыяй Васільеўнай Вяршковай, Заслужанай настаўніцай, якая выкладала рускую мову і літаратуру і не адно дзесяцігоддзе сеяла «разумнае, добрае, вечнае» ў сярэдняй школе № 1 г. Крупкі; сустрэнешся з палкоўнікам Мельнічонкам Міка-лаем Мікалаевічам; пастараешся адгадаць, што хвалявала самадзейнага мастака Юрыя Кур’яновіча падчас яго працы…
Асобна хочацца сказаць пра работы Сурэна Навасардзяна. Як стала вядома, у мастака не адзін дзясятак напісаных партрэтаў. Сярод перададзеных на выставу работ – аўтапартрэт, партрэт дачкі, а таксама копіі фрагментаў карцін такіх сусветна вядомых мастакоў, як Леанарда да Вінчы, Рубенс, Рэмбрант.
Паважаныя крупчане і госці г. Крупкі, пастарайцеся знайсці час, каб дакрануцца да сапраўднага мастацтва, каб сустрэцца са знаёмымі і незнаёмымі для вас людзьмі на выставе работ партрэтнага жанру «І ў профіль і ў анфас», якая будзе доўжыцца да 7 лютага.
Таццяна БОНДАР,
навуковы супрацоўнік Крупскай мастацкай галерэі.
Во вторник, 8 июля, с 9.00 до 10.00 состоится прямая телефонная линия с главным врачом УЗ «Крупская ЦРБ» ЛЕОНОВИЧ Екатериной Михайловной. 
