– Дзень абароны Зямлі пачаў адзначацца ў ХХ стагоддзі, – нагадала падчас адкрыцця свята дырэктар Цэнтра дзіцячай творчасці Ірына Драніца. – Менавіта ў гэты перыяд вучоныя падлічылі, што калі не падтрымліваць экалогію Зямлі, чалавецтва можа загінуць праз 300, максімум 1000 гадоў. Пры ўсведамленні такой перспектывы ўзнікае непазбежнае жаданне задумацца. Здавалася б, што Зямля – вечная, што чалавек будзе жыць на ёй заўсёды. А на самой справе пагроза канца ўсяго жыцця хаваецца ў самім чалавеку. Праблема забруджвання глебы на тэрыторыі населеных месцаў заўсёды была актуальнай, бо глеба з’яўляецца фактарам рызыкі асяроддзя пражывання, які ўплывае на якасць жыцця і здароўя насельніцтва.

Далей Ірына Уладзіміраўна гаварыла аб тым, што на сённяшні дзень гэта пытанне застаецца нявырашаным. І Дзень абароны Зямлі заклікае ўсіх жыхароў планеты тварыць добрыя справы і абараняць прыроду, беражліва адносіцца да ўсяго жывога, інфармаваць усіх жыхароў планеты аб важнасці захавання і беражлівага карыстання прыроднымі рэсурсамі. 

– Зямля – гэта наш дом, а Дзень абароны Зямлі заклікае нас навесці ў ім парадак, – працягвала Ірына Драніца. – Самы маленькі ўчынак кожнага з нас, напрыклад, убраць смецце на паляне, дзе толькі што адпачывалі, ачысціць вадаём ад смецця, высадзіць новыя дрэвы, рацыянальна выкарыстоўваць ваду, энергетычныя рэсурсы, раз у тыдзень адмовіцца ад аўтамабіля, дазволіць зрабіць нашу планету чысцей і лепей, на некалькі тысячагоддзяў падоўжыць жыццё ўсяго жывога.

Так, у гэты дзень сусветная грамадскасць успамінае, што ад Зямлі і дабрабыту на ёй залежым усе мы і напамінае: штогадовае выкананне маленькіх спраў дазволіць нам беражліва адносіцца да прыроды і зберагчы нашу планету.

І вось пачалася квэст-гульня. Кожная каманда атрымлівае карту і пачынае з той станцыі, якая адзначана лічбай 1. Час праходжання кожнай станцыі да 20 хвілін. За правільнае яе праходжанне каманда атрымлівае пазл. З 6 пазлаў у канцы гульні рабяты павінны былі сабраць карцінку «Свет прыроды». Хлопчыкі і дзяўчынкі праходзілі станцыі «Затоплены востраў», «Другое жыццё адходаў», «Характар наш і братоў нашых меншых», удзельнічалі ў гульнях «Ноеў каўчэг», «Папераджальныя знакі», «Дыханне прыроды», дапісвалі экалагічную казку «Маша і Мядзведзь». Вялікую цікавасць выклікала гульня «Лясная аптэка», калі па фатакартках трэба было ўгадаць лекавыя расліны і іх уласцівасці. Пераможцы конкурсаў і гульняў атрымалі Дыпломы.

У гэты ж час у гарадскім парку аддзелам адукацыі, фізкультуры і спорту праводзілася  «Турландыя», дзе 13 каманд, згодна маршрутнага ліста, праходзілі камбінаваную паласу перашкод, агнявую падрыхтоўку, велатрыял, устанаўлівалі турысцкую палатку, адказвалі на пытанні краязнаўчай віктарыны, праводзілі конкурс мастацкай самадзейнасці. Першае месца тут заняла каманда Хацюхоўскай СШ, другое – раённай гімназіі, трэцяе месца – каманда ваенна-патрыятычнага клуба «Рубеж».

У заканчэнні ўсе прысутныя паласаваліся паходнай кашай і наталілі смагу цудоўнай гарбатай. А пасля ўсе ўдзельнікі квэст-гульні і «Турландыі» правялі акцыю «Чысты вадаём».