Мы паведамлялі ўжо, што ў снежні бягучага года органы, якія рэгіструюць акты грамадзянскага стану, будуць адзначаць 100-годдзе з дня свайго ўтварэння. У юбілейны год запланавана шмат самых розных мерапрыемстваў. Адно з іх – вясельная рэтравыстава, якая ў нашым горадзе ў аддзеле ЗАГС будзе дзейнічаць з верасня па снежань.Вось што нам расказала аб гэтым начальнік аддзела ЗАГС Крупскага райвыканкама Святлана ГАРНАК:
– На выставе можна будзе прасачыць, як мяняліся традыцыі і вясельная мода на працягу мінулага стагоддзя. Цяпер мы збіраем вясельныя атрыбуты: сукенкі нявесты, туфлі, вэлюм, шляпкі, сумачкі, упрыгажэнні, касцюмы жаніха, старыя вясельныя фотаздымкі. Упэўнена, што ў многіх сем’ях захоўваецца хоць штосьці з названых рэчаў. У раённай газеце змяшчалася просьба прадастаўляць іх нам у якасці часовых экспанатаў. Хачу яшчэ раз напомніць, што ўдзел ў папаўненні экспазіцыі можа прыняць любы жыхар раёна.
Галоўным упраўленнем юстыцыі Мінскага аблвыканкама кіраўнікі раённых органаў запісаў актаў грамадзянскага стану запрашаліся на выставу «2017 – год 100-годдзя ЗАГС», якая размяшчаецца ў будынку Мінскага аблвыканкама і адкрылася ў Дзень сям’і. Усе былі проста ў захапленні ад убачанага. Нам расказалі, што сям’я са Смалявіцкага раёна прапанавала для экспазіцыі сукенку, якая была сшыта 81 год таму. Аднак на выставу яна не трапіла, бо не знайшлося манекена – такой худзенькай была дзяўчына, якая выходзіла ў ім замуж у 1936 годзе. Таму самым старым экспанатам стала сціплая сукенка 1953 года. Увагу ўсіх прысутных прыцягнуў вянок з воску – такім часта ўпрыгожвалі прычоску нявесты ў 50-я гады. Нам расказалі аб тым, калі нарадзілася вясельная мода, у якіх сукенках выходзілі замуж, з якой тканіны іх шылі, калі з’явіўся вэлюм.
У калекцыю выставы трапілі і першыя пасляваенныя дакументы, якія дазвалялі органам ЗАГС аднаўляць запісы акта шлюбу і рэгістраваць нараджэнне дзіцяці на падставе паказанняў сведкаў. Цікава было прачытаць указанні камісара міліцыі Масквы з прычыны таго, што органы ЗАГС павінны ўдзяляць асаблівую ўвагу пашпартам маладых. Аказваецца, ваеннаслужачыя часта спрабавалі зарэгістраваць паўторныя шлюбы пры жонках, якія ў іх былі ўжо. Наогул, шмат чаго ўнікальнага, адметнага і незвычайнага можна было ўбачыць на рэтравыставе.
Пажадана, каб і экспазіцыя, якая будзе выстаўлена ў нашым аддзеле ЗАГС, таксама выклікала інтарэс у крупчан. Дарэчы, ужо сёння ў нас ёсць больш двух дзясяткаў фатаграфій маладых людзей падчас рэгістрацыі шлюбу ў 60-х, 70-х, 80-х гадах мінулага стагоддзя. Іх нам прадаставілі Ухвальскі, Ігрушкаўскі, Акцябрскі, Хацюхоўскі, Бобрскі і Халопеніцкі сельвыканкамы. Хочацца звярнуцца да крупчан з просьбай прыносіць у райаддзел ЗАГС рэдкія дакументы, фатаграфіі, наогул любыя вясельныя атрыбуты. Будзем вельмі ўдзячны ўсім, хто не застанецца раўнадушным да такой адметнай падзеі – 100-годдзя ўтварэння органаў ЗАГС. Упэўнена, ніводзін чалавек не абмінае гэту ўстанову, хоць раз у жыцці, але звяртаецца да нас.
Яшчэ раз запрашаю прыняць удзел у папаўненні экспазіцыі «Шчаслівыя імгненні кахання». Пасля заканчэння работы выставы ўсе прадметы абавязкова будуць вернуты ўладальнікам.
