Як вядома, лясная гаспадарка вырашае вялікія дзяржаўныя задачы ў галіне аднаўлення, аховы і абароны лясоў. Штогод на работы па добраўпаракаванні лясоў і навядзенні парадку на землях ляснога фонду арганізацыяй лясной гаспадаркі накіроўваюцца значныя сілы і сродкі.Садзейнічанне падтрыманню ў належным стане земляў ляснога фонду з’яўляецца абавязкам кожнага грамадзяніна. Разам з тым, па-ранейшаму актуальнай застаецца праблема несанкцыянаваных звалак будаўнічых і бытавых адходаў, іншых пабочных прадметаў у лясах, якія прымыкаюць да аўтамабільных і чыгуначных дарог, вакол населеных пунктаў, садаводчых таварыстваў, на пляцоўках адпачынку і аўтастаянках.
– Менавіта для прыцягнення мясцовага насельніцтва, моладзі, грамадскасці да дзейнасці лясной гаспадаркі 7 кастрычніка бягучага года і праводзілася добраахвотная акцыя пад дэвізам «Наш чысты лес», – адзначыла намеснік дырэктара Крупскага лясгаса па ідэалагічнай рабоце Наталля Камовіч. – Напярэдадні ў нас была створана рабочая група, распрацаваны і зацверджаны план мерапрыемстваў па падрыхтоўцы і правядзенні добраахвотнай акцыі, вызначаны аб’екты. У Крупскай пасялковай сярэдняй школе, Ухвальскай, Абчугскай, Ігрушкаўскай, Халопеніцкай, Бобрскай і СШ № 3 горада былі праведзены лекцыі аб значэнні лесу. Толькі за адзін дзень 7 кастрычніка з 17-ці вызначаных аб’ектаў было ўбрана 76,2 куб. м смецця і сухога галля, ліквідавана 1,8 м3 адходаў, на плошчы 1,2 га наведзены парадак ля помніка Герою Савецкага Саюза Васілю Чабатарову.
Далей Наталля Камовіч расказала, што ў добраахвотнай акцыі прыняло ўдзел 317 чалавек. Гэта – работнікі лясгаса, прадстаўнікі райвыканкама і раённай арганізацыі грамадскага аб’яднання «Белая Русь», школьнікі. Работнікі Сяляўскага лясніцтва, у прыватнасці, убіралі берагі возера Сялява, зоны адпачынку «Залаты рог» і «Шып», Выдрыцкага – кварталы 15, 16 і 25, Халопеніцкага – зону адпачынку «Выспа» і берагі Сялявы, Крупскага лясніцтва – навялі парадак ля помніка воінам 1812 года. Работнікі Бобрскага доследна-вытворчага лясніцтва ўбралі тэрыторыю ля месца адпачынку «Крыніца», што на рацэ Бобр. Наогул, літаральна ўсімі лясніцтвамі і добраахвотнікамі былі ўбраны месцы адпачынку, вызначаныя кварталы, асаблівая ўвага ўдзялялася ачыстцы лесу паблізу населеных пунктаў.
