І ў гэтым даводзіцца пераконвацца кожны дзень. Апалае лісце на вуліцах горада і на дваровых тэрыторыях, адцвіўшыя кветкі, сухую расліннасць убіраюць работнікі КУП “Жылцеплабуд”. На навядзенне парадку ў гарадскім парку на дапамогу ім прыходзяць прадстаўнікі тых арганізацый, якія замацаваны за гэтай тэрыторыяй. Сабранае лісце грузіцца на трактары і адвозіцца на смеццезвалкі.А вось што нам расказаў аб рабоце ў гэтыя кастрычніцкія дні старшыня Бобрскага сельвыканкама Уладзімір Загорскі:
-- Яшчэ на пачатку месяца работнікі Бобрскай урачэбнай амбулаторыі ўбралі і добраўпарадкавалі падведамасную тэрыторыю, а цяпер пастаянна падтрымліваюць на ёй парадак. Тое ж самае датычыць Бобрскай і Каласоўскай сярэдніх школ, якія размяшчаюцца на тэрыторыі сельсавета. Нашы сацыяльныя работнікі навялі парадак на праваслаўных і каталіцкіх могілках г.п. Бобр. Уборкай прыдарожных палос на аўтадарозе Р-62 займаліся работнікі філіяла ДЭУ-69 участка лінейна-дарожнай дыстанцыі № 692. А вось рабочыя і служачыя нашага сельвыканкама спілавалі і ўбралі аварыйныя дрэвы на мемарыяле В.М. Чабатарова, у вёсцы Дворышча, па вуліцы Пушкіна гарадскога пасёлка, на грамадзянскіх могілках у вёсцы Куты, пачысцілі і абшылі калодзеж у вёсцы Скакоўка. І работы, дарэчы, працягваюцца і сёння.
Ветэранскімі арганізацыямі сельсаветаў, усімі навучальнымі ўстановамі і актывістамі райкама ГА “БРСМ” акцэнт быў зроблены на добраўпарадкаванні воінскіх пахаванняў і помнікаў.
Пра лясныя ўгоддзі і зоны адпачынку работнікі лесагаспадарчых прадпрыемстваў клапаціліся не толькі падчас добраахвотнай акцыі “Наш чысты лес”, якая прайшла 7 кастрычніка. На перыяд правядзення месячніка тут таксама склалі план мерапрыемстваў і строга прытрымліваюцца яго выканання.
Асобна варта сказаць аб многіх гаспадарах уласных сядзіб, якія клапоцяцца аб чысціні і парадку на сваіх тэрыторыях. Прыемна бачыць, як яны абкошваюць траву ля агароджаў, змятаюць і зносяць апалае лісце, убіраюць засохлыя кветкі, якія ўсё лета радавалі і саміх гаспадароў, і тых, хто праходзіў міма падворкаў.
Надвор’е мінулых дзён спрыяла работам па добраўпарадкаванні тэрыторый, а ранішнія марозікі пасадзейнічалі больш хуткаму ападанню лісцяў. Будзем меркаваць, што на бягучым тыдні чысціня і парадак будуць наведзены ўсюды.
