Падчас чэрвеньскага Адзінага дня інфармавання будзе абмяркоўвацца тэма прыродных рэсурсаў і іх рацыянальнага выкарыстання ў краіне. Пагадзіцеся, тэма актуальная заўсёды. А ў Год малой радзімы – асабліва. Ці заўважаем мы ў мільганні дзён нашага мітуслівага жыцця прыгажосць і веліч прыроды? Відавочна, што не ўсе. Бо каб заўважалі, то менш бы смецілі і забруджвалі…Давайце спынімся і азірнемся! Крупшчына – дзіўны куточак Беларусі. Унікальная сваёй прыгажосцю і шчодрасцю прырода нашага краю. Раён раскінуўся сярод палёў і лясоў беларускай зямлі на мяжы Мінскай і Віцебскай абласцей. Яго тэрыторыя складае 2 136 квадратных метраў, пры гэтым 51 працэнт плошчы заняты лясамі. Выцягнуты з поўначы на поўдзень, па сваіх контурах ён нагадвае вялікае сэрца.
Па Крупшчыне працякае важнейшая водная артэрыя раёна – маляўнічая рака Бобр. Пачынаючы з Аршанскай узвышанасці, яна плаўна нясе свае воды да Бярэзіны. Жамчужынай раёна па праву лічыцца возера Сялява. Акрамя гэтага неймаверна прыгожага воднага люстэрка, у нас яшчэ ёсць 7 азёр, 26 рэк, 37 ручаёў, 3 вадасховішчы і столькі ж сажалак.
Дзяржаўны ландшафтны заказнік «Сялява» дбае пра захоўванне ў натуральным стане прыродна-ландшафтнага азёрнага комплексу з папуляцыямі рэдкіх і знікаючых відаў раслін і жывёл, занесеных у Чырвоную кнігу Беларусі. Агульная плошча заказніка – больш за 19 тысяч гектараў, або 17,5% ад агульнай плошчы раёна. У ім 142 віды птушак, 40 відаў млекакормячых і расце 578 відаў раслін.
На тэрыторыі Крупскага лясгаса знаходзяцца ландшафтны заказнік рэспубліканскага значэння “Чарневічы”, біялагічны заказнік рэспубліканскага значэння “Дзянісавічы”, водна-балотныя заказнікі мясцовага значэння “Белы востраў”, ”Ліпкі” і “Макаўе”. Яшчэ ў 1990 годзе арганізаваны біялагічны заказнік мясцовага значэння “Брышча”.
У Крупскім ваенным лясгасе знаходзяцца водна-балотныя заказнікі мясцовага значэння “Нача” і “Еленка”.
Багата наша крупская зямля і на крыніцы. У раёне 5 гідралагічных аб’ектаў, аб’яўленых гідралагічнымі помнікамі прыроды мясцовага значэння. Гэта – усім вядомая крыніца “Бобр”, якая знаходзіцца ля маста ракі Бобр, крыніца ва ўрочышчы “Высокія горы” (у 2-х км ад аграгарадка Нача і ў 800 м на ўсход ад вёскі Барок), “Бяздонная яма” (побач з папярэдне названай крыніцай ва ўрочышчы “Высокія горы”), крыніца “Лясная”, якая сцякае ў Сяляву з узвышша гары ў 2-х км на поўнач ад Прошыкі, і крыніца ў вёсцы Стары Сакол. Той, хто хоць аднойчы паспрабаваў сцюдзёнай крыштальнай вады з гэтых крыніц, абавязкова вернецца да іх зноў і зноў.
Давайце будзем вывучаць, любіць і берагчы нашу прыроду – наш утульны дом!
