– Выстава з’яўляецца працягам фотапраекта ўжо знаёмага крупчанам фатографа-аматара з Мінска Канстанціна Мельніка, – расказвае навуковы супрацоўнік галерэі Хрысціна Жукава. – Гэта экспазіцыя-падарожніца, якая пабывала ўжо ў многіх галерэях. І вось цудоўныя фота могуць паглядзець крупчане і госці нашага раёна.

Цікавыя звесткі мы даведаліся пра аўтара. Вольга скончыла мастацкае вучылішча па спецыяльнасці мастак, зараз працуе мастаком кампьютарнай графікі і фатографам.

Аднойчы на рабоце ўзнікла патрэба тэхнічнай здымкі, набылі сучасны фотаапарат. І з той пары Вольга літаральна «захварэла» фатаграфіяй. Скончыла курсы ў фоташколе і мае ўжо багаты вопыт выставачнай дзейнасці.

– Вольга неяк падзялілася, што фатаграфія для яе – гэта спосаб паказаць свет праз свае вочы, – працягвае Хрысціна Жукава. – Кожны здымак з’яўляецца часткай самога аўтара. Калі мы запыталіся ў мастачкі, чаму яе ўлюбёным жанрам з’яўляецца менавіта пейзаж, то яна адказала, што пейзаж – гэта латарэя, бо сама здымка цікавая сваёй непрадказальнасцю. Прыродзе не скажаш, што мне патрэбна святло вось на гэтым камяні, а вось тут павінна быць воблака… Яна можа падараваць феерычныя фарбы, а можа закапрызіцца. Убачыць і занатаваць незвычайны стан прыроды – гэта ўдача.

Гледзячы на здымкі Вольгі, мы ўпэўніліся, што ёй сапраўды ўдалося злавіць вельмі ўдалыя моманты настрою цудоўнай прыроды Крыма. Мора, горы, найбагацейшая палітра восеньскіх фарбаў...

Прыходзьце ў галерэю! Выстава будзе доўжыцца да 18 жніўня.