– Увосень сапраўды работ восем, а восеньскае ворыва глебы – адна з завяршальных, – пачала нашу размову галоўны аграном таварыства Ілона Ляпеха. – І кожная тэхналагічная аперацыя павінна выконвацца ў аптымальныя тэрміны. На сённяшні дзень зябліва ўзнята ў нас на большай частцы плошчы. Наступнай вясной тут размесцяцца асноўныя культуры: пшаніца, авёс, ячмень. У гэтыя дні на ворыве задзейнічаны шэсць энерганасычаных трактароў з абаротнымі плугамі і два звычайных. палі да будучай сяўбы рыхтуем цяпер. Такі падыход забяспечвае найбольшую выгоду ад уносімых угнаенняў і павышае аддачу гектара. Да таго ж, своечасовае ворыва зябліва гарантуе аператыўнае ўключэнне гаспадаркі ў веснавую пасяўную і папярэджвае рост пустазелля.

І ў тым, што тэхніка тут не прастойвае, мы пераканаліся, пабываўшы на палетках ля вёскі Бярозаўка, дзе механізатары вялі ўздым зябліва на апошніх гектарах, мяркуючы пасля абеду пераехаць на іншае поле. Было відавочна, што стараюцца ўсе. Не адну сотню гектараў, напрыклад, запісаў на свой рахунак механізатар Сяргей Кляшчонак, які працуе на магутным трактары «Беларус 3522» з плугамі «ППО 9-45». Гэта менавіта ў гонар яго на тэрыторыі механічнай майстэрні таварыства развяваецца Флаг працоўнай славы. Добрыя вынікі паказваюць Дзяніс Драбкоў, Юрый Худалей і Рыгор Шахрай, якім падуладны таксама трактары «Беларус 3522», Сяргей Белы – ён кіруе трактарам «Джон Дзір» з плугамі «Геркулес», Міхаіл Малашчанка на «Беларус 3022» з плугамі «ППО 8-40». Не адняць майстэрства і ў Рыгора Гапеева і Аляксандра  Колесеня – гэтыя механізатары шчыруюць на трактарах «Беларус 1221» з плугамі «ППО 5-40». За працоўны дзень яны імкнуцца ўзняць як мага большую плошчу. Рыхтаваць глебу для веснавой сяўбы пачалі ў канцы верасня. Стаўку, як бачым, зрабілі на энерганасычаную тэхніку, выкарыстоўваючы яе ўвесь светлавы дзень. Да канца кастрычніка, па словах галоўнага агранома, работа будзе поўнасцю завершана.

На 1 119 гектарах унесены гліфасатутрымліваючыя прэпараты, якія ачышчаюць палі ад шматгадовага пустазелля. У гаспадарцы, дарэчы, ужо не першы год ажыццяўляецца комплекс мерапрыемстваў па прымяненні такіх прэпаратаў. Апошнім часам яны ўносяцца непасрэдна восенню, каб падоўжыць іх тэрмін дзеяння.

– Сёння можна смела гаварыць, што прымяненне прэпаратаў безупыннага дзеяння станоўча адбіваецца на ўраджаі сельскагаспадарчых культур, – працягвала Ілона Уладзіміраўна. – Адначасова з уздымам глебы ўносяцца і арганічныя ўгнаенні. Вывазкай іх на палеткі ад жывёлагадоўчых комплексаў і ферм у нас займаюцца вопытныя механізатары Васіль Худалей і Уладзімір Квяткоўскі, на пагрузчыку «Амкадор» працуе Сяргей Чыстоў. І тут тэхніка не ведае прастояў. Наогул, зяблеваму ворыву – асноўнаму прыёму агратэхнікі – мы надаем вялікае значэнне. Як бы ні складвалася надворныя ўмовы, яно садзейнічае стварэнню ў глебе спрыяльнага рэжыму для раслін і забяспечвае прырост ураджаю. Але асноўная перавага – гэта скарачэнне тэрмінаў веснавых палявых работ.