Па папярэдняй дамоўленасці, а дзясятай гадзіне, якраз калі заканчваецца ранішняя дойка, мы завіталі на ферму. Усе даяркі былі ў зборы, у гэты час на чале са сваім кіраўніком яны сядзелі за сталом у «чырвоным кутку» і пілі гарбату. Так-так, з кубкаў таго сервізу, што ім быў падораны крыху больш месяца таму. Як лічыць загадчык фермы, такія кароткія хвіліны адпачынку, што праводзіць калектыў разам, толькі на карысць, бо аб’ядноўваюць і згуртоўваюць людзей. Вось так, у непрымусовай абстаноўцы, мы і павялі размову пра задачы, што стаяць перад калектывам, пра дасягнутае за прайшоўшы час, пра сакрэты поспеху.

– Пад маім кіраўніцтвам знаходзіцца 17 чалавек, з іх 5 аператараў машыннага даення, – расказвае Рыгор Крыгін. – Наша жывёлагадоўчая ферма змешаная, на ёй утрымліваецца дойны статак – 207 кароў, і маладняк буйной рагатай жывёлы – 257 галоў. І вось ужо які месяц запар мы лідзіруем у нашай гаспадарцы нават сярод малочнатаварных комплексаў «Плавучае» і «Маслёнка». І гэта невыпадкова. У мяне проста цудоўныя даярачкі, якія любяць сваіх каровак, ведаюць іх мянушкі, і нават нораў. Вось такая душэўная атмасфера, адносіны да жывёлы ў многім спрыяюць вынікам працы. Даяркі стараюцца ўсе. Успамінаем, што ўлетку былі такія дні, што толькі за суткі пры двухразовым даенні мы атрымлівалі звыш чатырох тон малака.

Рыгор Міхайлавіч можа шмат расказваць пра кожнага аператара машыннага даення. Дарэчы, кожная з іх абслугоўвае па 53-54 каровы. Вось, напрыклад, Таццяна Якушава працуе амаль шэсць гадоў на гэтай ферме, валавы надой за 10 месяцаў па яе групе склаў 223 тоны, ад кожнай каровы яна надаіла па 4 514 кілаграмаў малака пры заданні 3 767 кг. Па 3 961 кілаграму сырадою ад кожнай каровы атрымала Людміла Шалагіна, працоўны стаж якой 9 гадоў. Валавы надой па яе групе за гэты час склаў 206 тон. Да месца будзе сказаць, што пра ўсе лічбы можна даведацца з інфармацыйнага стэнда, змешчанага ў «чырвоным кутку» фермы. Па 10 гадоў дояць кароў Алеся Сімановіч і Вераніка Акуліч, 8 гадоў толькі на Вялікаслабодскай ферме працуе даяркай Галіна Драздова, наогул жа яе стаж бярэ пачатак у 1990 годзе. Старанна працуе падменная даярка Святлана Шабасова.

– За 10 месяцаў бягучага года валавы надой па нашай ферме склаў 813 тон, або 108% да ўзроўню мінулага года, на кожную карову ў сярэднім прыходзіцца 3 925 кілаграмаў, – працягваў Рыгор Міхайлавіч. – На сёння на карову надойваюць амаль па 11 кілаграмаў малака ў суткі. Цяпер усе каровы цельныя, у чым заслуга нашага асемянатара Ірыны Шахрай, якая працуе ў нас ужо чатыры гады і ў сваёй рабоце вызначаецца стараннасцю і адказнасцю. Але, не прымяншаючы ролі аператараў машыннага даення, хачу пахваліць і нашых жывёлаводаў-пастухоў, дзякуючы якім і надоі ў нас важкія. Гэта – Алег Быкаў, Сяргей Сімановіч, Аляксандр Макарэвіч, Васіль Зуёнак. Статак знаходзіўся на кругласутачным утрыманні з 26 красавіка па 13 верасня. Самі ведаеце, якое спякотнае лета было. У пошуках больш-менш прыгоднай пашы кароў ганялі ажно пад Ротань у пушчу. Наогул, дзе была трава, там і пасвілі. Але вытрымалі. І вытрымалі годна. Хачу некалькі слоў сказаць і пра даглядчыкаў, таму што прывагі маладняку буйной рагатай жывёлы па ферме таксама добрыя. Валавая прывага з пачатку года склала 46 тон, што на 6,3 тоны вышэй аналагічнага перыяду папярэдняга года. Вышэйшая мінулагодняй і сярэднясутачная прывага маладняку – яна склала 569 грамаў. Шчыруюць аператары машыннага даення творча, пастаянна абапіраючыся на лепшы вопыт работы з жывёлай. Сваёй працай мы хочам паказаць, што можна атрымліваць найлепшыя вынікі і ва ўмовах традыцыйнай малочнатаварнай фермы. Сакрэт поспеху калектыву – належная арганізацыя працы, захаванне тэхналогіі кармлення, даення і ўтрымання кароў, якасныя кармы і, безумоўна, стараннасць і душэўны падыход да справы нашых людзей.