Завяршаецца падпісная кампанія на ІV квартал бягучага года. І менавіта ў гэтыя вераснёўскія дні па традыцыі праходзяць Дні падпісчыка. На пачатку тыдня акцыя «Абласны дзень падпісчыка» адбылася ва ўсіх аддзяленнях паштовай сувязі раёна. І адразу заўважым, што толькі ў гэты дзень крупчане выпісалі 865 экземпляраў газет і часопісаў, з іх 304 экземпляры раённай газеты «Крупскі веснік».І на гэты раз мясцовыя журналісты не прамінулі такой падзеі і наведалі гарадское аддзяленне паштовай сувязі Крупкі-1.
– Асноўная мэта акцыі – актывізацыя падпісной кампаніі, прыцягненне ўвагі патэнцыяльных падпісчыкаў і стымуляванне росту падпісных тыражоў газет і часопісаў на апошні квартал 2015 года, – гаварыла начальнік Крупскага ўчастка паштовай сувязі Барысаўскага раённага вузла паштовай сувязі Людміла Пацэева. – Як бачым, многія крупчане прачыталі аб’яву аб абласным Дні падпісчыку ў раённай газеце, а таксама змешчаную пры ўваходзе ў гарадское аддзяленне, таму і прыйшлі, каб выпісаць тое ці іншае перыядычнае выданне, азнаёміцца з газетамі і часопісамі, выкладзенымі на стале. Каб хутка абслужыць усіх падпісчыкаў, афармленнем абанементаў асобна сёння займаецца яшчэ адзін аператар сувязі. Мы ўсе разам стараемся, каб друкаванае слова прыходзіла ў кожны дом. Прыемна адзначыць, што амаль кожны, хто прыходзіць да нас, каб заплаціць камунальныя паслугі або атрымаць пенсію, у абавязковым парадку выпісвае раённую газету.
І мы пераканаліся ў гэтым на самым пачатку правядзення Дня падпісчыка. Ужо чакалі вызначанага часу Марыя Кулевіч з вул. Перамогі, Святлана Шавялёва з вуліцы Савецкай, Ірына Жук з вуліцы Палявой, Тамара Будэйка з завулка Вакзальны, Дзіяна Асіповіч з вуліцы Усходняй і іншыя. Усе яны гаварылі добрыя словы ў адрас раёнкі, бо выпісваюць «Крупскі веснік» ужо не адзін дзясятак гадоў, заўсёды цікавяцца дзейнасцю тых прадпрыемстваў і арганізацый, у якіх працавалі або працуюць зараз, падабаецца ім чытаць пра знакамітых людзей Крупшчыны. Па іх словах, не прапускаюць і асвятленне розных мерапрыемстваў, што праходзяць у раёне. Прыемна, што перавагу раённай газеце аддавалі як пастаянныя чытачы, так і новыя. Той, хто афармляў падпіску на наша перыядычнае выданне, атрымліваў памятны сувенір – ручку і блакнот з лагатыпамі газеты «Крупскі веснік».
А начальнік Крупскага ўчастка паштовай сувязі Людміла Пацэева заўважыла:
– Звяртаюся да тых крупчан, якія яшчэ не падоўжылі падпіску: паспяшайцеся ў гэтыя дні ў паштовыя аддзяленні ці звяртайцеся да паштальёнаў, бо падпісацца на апошні квартал года можна да 28 верасня ўключна. Вас чакаюць у 17-ці стацыянарных паштовых аддзяленнях, трох перасоўных і на мотадастаўцы. Карыстаючыся момантам, хачу адзначыць начальнікаў аддзяленняў паштовай сувязі, якія пастаянна аднаўляюць колькасць выпісаных раней выданняў. Гэта Наталля Сакалова – пасёлак Крупскі, Марыя Цэхавая – аграгарадок Худаўцы, Надзея Давыдава – аграгарадок Ігрушка, Валянціна Моніч – аграгарадок Дакудава, Людміла Дудко – аграгарадок Ухвала і іншыя. Варта сказаць, што і жыхары населеных пунктаў, якіх абслугоўваюць нашы перасоўныя аддзяленні, таксама імкнуцца выпісваць перыядычныя выданні, бо ведаюць, што яны будуць дастаўлены ў тэрмін. А тым, хто хоча павіншаваць сваіх родных, блізкіх, сяброў, падкажу: падпіска можа стаць добрым падарункам.
На гарадскім аддзяленні паштовай сувязі Крупкі-1 у Дзень падпісчыка было выпісана 127 экземпляраў газет і часопісаў, у тым ліку 53 экземпляры «Крупскага весніка».
