У гарадское аддзяленне сувязі карэспандэнты нашай газеты прыйшлі задоўга да вызначанага часу. Аднак многія жыхары горада нас ужо чакалі. Аб тым, што менавіта ў 11 гадзін пачнецца акцыя «Абласны дзень падпісчыка», яны даведаліся з аб’явы Крупскага ўчастка паштовай сувязі Барысаўскага раённага вузла паштовай сувязі, змешчанай у «Крупскім весніку» якраз напярэдадні. Не губляючы часу, наведвальнікі гэтага аддзялення знаёміліся з міні-выставай найбольш папулярных газет і часопісаў, іншай рэкламнай прадукцыяй.
– Асабіста маю ўвагу прыцягнула акцыя, аб’яўленая рэдакцыяй раённай газеты, – заўважыў Васіль Сяргун. – Той, хто аформіць паўгадавую падпіску на «Крупскі веснік» менавіта ў абласны дзень падпісчыка, атрымае бонус – бясплатную падпіску на ліпень 2016 года. Вось я і прыйшоў, каб скарыстаць такую магчымасць, тым больш, што ў такой акцыі прымаў ужо ўдзел у чэрвені бягучага года, і на студзень выпісваць раёнку мне не трэба было. Ведаю, што да гэтай акцыі далучыліся многія і многія крупчане.
І сапраўды, рэдакцыя бясплатна аформіла падпіску на райгазету на студзень наступнага года сямідзесяці аднаму крупчаніну. Да месца адзначыць, што асобныя жыхары горада ведаюць, што раёнку можна выпісаць у рэдакцыі ў грамадскага распаўсюджвальніка, таму і звяртаюцца непасрэдна да яго. Толькі да нас у абласны дзень падпісчыка звярнулася 25 гараджан, якія выпісалі газету адразу на паўгода.
– Як вядома, асноўная мэта абласнога дня падпісчыка – актывізаваць падпісную кампанію, прыцягнуць увагу патэнцыяльных падпісчыкаў і стымуляваць рост тыражоў газет і часопісаў на І паўгоддзе 2016 года, – гаварыла начальнік Крупскага ўчастка паштовай сувязі Людміла Пацэева, якая прымала самы актыўны ўдзел у гэтым мерапрыемстве. – Як бачым, крупчане прачыталі аб’явы ў раённай газеце аб Дні падпісчыка і аб праводзімай акцыі, таму ахвотна заходзяць сёння ў наша аддзяленне сувязі. Карыстаючыся магчымасцю, хачу напомніць, што да заканчэння падпіскі на перыядычныя выданні засталося зусім мала часу, таму заклікаю паспяшацца тых, хто адкладвае гэту справу на потым. Напомню, што асноўныя выданні можна выпісаць да 25 снежня, на раённую газету – да 30 снежня ўключна. Каталогі друкаваных сродкаў масавай інфармацыі Рэспублікі Беларусь на наступны год, у якіх змешчана шмат самых розных выданняў, ёсць ва ўсіх сельскіх аддзяленнях сувязі, у перасоўных аддзяленнях паштовай сувязі, у грамадскіх распаўсюджвальнікаў. Таму прыходзьце да нас, звяртайцеся да паштальёнаў, усе разам мы імкнемся да таго, каб друкаванае слова прыходзіла ў кожны дом.
Да месца адзначыць, што прыхільнікі раённай газеты, якія завіталі ў гарадское аддзяленне сувязі, атрымлівалі ў падарунак і сувенірную прадукцыю з лагатыпам “Крупскі веснік”. Бясспрэчна, што больш за ўсё падпісчыкаў у раённай газеты. Тыраж раёнкі – амаль 5 тысяч экземпляраў – не быў бы такім без даверу крупчан да сваёй мясцовай газеты. Пацвярджэнне таму – удзячныя словы нашых пастаянных чытачоў, якія мы пачулі ў Дзень падпісчыка.
Фота Аляксандра БУДЗЬКО.
