Нагадаем, што нарадзіўся ён у вёсцы Мачулішча 3 ліпеня 1935 года. Але пры рэгістрацыі дзіцяці ў дакументах памыліліся і паказалі, што яно з’явілася на свет 3 чэрвеня. Менавіта таму юбілейным можна смела лічыць цэлы месяц. А то і цэлы год – такая дата!
Днямі Васіля Васільевіча ўшаноўвалі ў Нацыянальнай акадэміі навук падчас рэспубліканскай навукова-практычнай канферэнцыі «Сучасная беларуская літаратура: праблемы, напрамкі, стылі», прысвечанай юбілейнай даце. Трэба адзначыць, што Васіль Зуёнак – кандыдат філалагічных навук, лаўрэат Дзяржаўнай прэміі імя Янкі Купалы, прэміі Ленінскага камсамола Беларускай ССР, ганаровы член Нацыянальнай акадэміі навук Беларусі.
Ад імя крупчан вітала паэта-земляка начальнік аддзела ідэалагічнай работы, культуры і па справах моладзі Таццяна Мельнік.
Яна распавяла, як усё было, і падзялілася сваімі ўражаннямі:
– Канферэнцыя праходзіла ва ўрачыста-дзелавой атмасферы. Гучала шмат віншаванняў, пажаданняў і добрых слоў. Адметна, што літаральна ўсе, хто выходзіў да трыбуны, чыталі вершы Васіля Зуёнка. І пачалася імпрэза песняй на яго словы. Сёння, нягледзячы на такі шаноўны ўзрост, ён застаецца актыўным удзельнікам літаратурнага жыцця, сустракаецца з чытачамі і натхняе сваёй творчасцю. А яна вельмі багатая. Уласна мне ён блізкі, па-першае, як паэт. Творчасць Зуёнка вылучаецца жанравай разнастайнасцю – ад лірычных вершаў да маштабных паэм. Яны прыцягваюць чытачоў сваім лірызмам, удумлівай мудрасцю, глыбінёй. Асаблівае месца ў творчасці займаюць вершы пра вайну, памяць, сувязь пакаленняў. Паэта хвалююць праблемы дзяржаўнасці, захавання традыцый. Такі цікавы факт – у 1978 годзе ў адным з рэпартажаў з космасу вершы Васіля Зуёнка з кнігі «Нача» чытаў таксама наш знакаміты зямляк, касманаўт Уладзімір Кавалёнак. Ад імя ўсіх крупчан я павіншавала юбіляра, пажадала моцнага здароўя і невычарпальнага творчага натхнення. А ён шчыра падзякаваў і перадаў усім прывітанне.
