Добразычлівая, старанная, адказная, вопытная – менавіта так характарызуе кіраўніцтва Крупскага раённага спажывецкага таварыства прадаўца магазіна вёскі Гумны Ухвальскага сельсавета Алену Уладзіміраўну Сіняк. У гэтыя зімовыя дні яна прымала віншаванні з юбілеем і ад райспажыўтаварыства, і ад родных і блізкіх, і, безумоўна, ад сваіх аднавяскоўцаў.– У нашай Алены Уладзіміраўны слаўны юбілей, – гаварыла намеснік старшыні праўлення раённага спажывецкага таварыства Ірына Гусеўская. – Гэта толькі ўявіць сабе – на адным месцы адпрацаваць столькі гадоў! Мы ўсе ганарымся, што ў нас ёсць такія людзі. З нагоды 70-годдзя з дня нараджэння Алена Уладзіміраўна за старанную і добрасумленную працу ў сістэме спажывецкай кааперацыі ўзнагароджана Ганаровай граматай праўлення Крупскага райспажыўтаварыства. І гэта не адзіная адзнака працы прадаўца. Яна штогод атрымлівае Граматы, Падзячныя пісьмы, матэрыяльныя заахвочванні.
Не трэба і казаць аб тым, што Алена Сіняк карыстаецца бясспрэчнай павагай і аўтарытэтам у сваіх аднавяскоўцаў. І не толькі. Ведаючы расклад работы гандлёвай кропкі і адказнасць прадаўца, жыхары іншых блізляжачых населеных пунктаў заўсёды з радасцю імкнуцца завітаць у гэты магазін. Вялікі асартымент прадуктаў – хлеб, батоны, цукар, алей, мука, сокі, малочныя прадукты, макаронныя і крупяныя вырабы, кансервы, гародніна, фрукты... Увесь тавар, які завозіцца сюды, карыстаецца попытам, што дазваляе выконваць даведзеныя планы. У прыватнасці, за 2017 год тавараабарот па гэтай гандлёвай кропцы склаў звыш 70620 тысяч рублёў.
Сама мясцовая, яна ведае кожнага, хто прыходзіць у магазін «Тавары штодзённага попыту», дасканала вывучыла і задавальняе попыт пакупнікоў. Акрамя прадуктаў харчавання, якія дастаўляюцца два разы на тыдзень, у магазіне можна набыць любы тавар прамысловай групы па заказу.
– У Гумнах сёння пражывае 51 чалавек, – гаварыла Алена Уладзіміраўна. – І амаль усе яны штодзённа заходзяць у гандлёвую кропку. Вяскоўцы добра ведаюць, калі прывязуць хлеб з Ухвалы, а калі з Беразіно. Таму я, калі бачу, хто падыходзіць ужо да магазіна, загадзя рыхтую пакупку. І на адпачынак трэба было б ісці, але кіраўніцтва ніяк не адпускае. Вось і зноў угаварылі папрацаваць яшчэ.
Пагадзімся, што павага пакупнікоў і добрыя водгукі даюцца не проста. Іх трэба заслужыць. І з поўнай упэўненасцю можна сказаць, што Алена Уладзіміраўна іх заслужыла. Яна імкнецца працаваць так, каб людзі з задавальненнем заходзілі ў свой мясцовы магазін.
