ХХV Міжнародная кніжная выстава-кірмаш, прысвечаная Году малой радзімы і міжнароднаму супрацоўніцтву беларускіх пісьменнікаў з літаратарамі розных краін, закончыла сваю работу 4 сакавіка. На адкрыцці гэтага значнага мерапрыемства прысутнічала і крупчанка, ветэран педагагічнай працы Валянціна Скваркоўская, якая была запрошана як адна з пераможцаў рэспубліканскага конкурсу ў намінацыі «Проза».Варта адзначыць, што напярэдадні правядзення выставы-кірмашу Саюзам пісьменнікаў Рэспублікі Беларусь з нагоды 100-годдзя з дня нараджэння беларускага паэта Алеся Бачылы быў арганізаваны літаратурны конкурс «Радзіма мая дарагая».
– Калі я даведалася аб гэтым конкурсе, адразу вырашыла прыняць у ім удзел, – расказвала Валянціна Іванаўна. – Справа ў тым, што творчасць Алеся Бачылы мне, як выкладчыку беларускай мовы і літаратуры, добра вядомая. Многія тэксты паэта пакладзены на музыку. Упэўнена, што ўсе ведаюць яго песню «Радзіма мая дарагая», якой і быў названы літаратурны конкурс. Пры напісанні конкурснага твора я імкнулася выказаць сваю любоў да маёй маленькай радзімы і любай Беларусі, да маіх паважаных землякоў. Нарадзілася я ў вёсцы Сяліба, што на Бярэзіншчыне. Гэта вёска і радзіма беларускага паэта і празаіка Рыгора Няхая. У вёсцы Месціна Бярэзінскага раёна нарадзіўся яшчэ адзін знакаміты беларускі паэт, сатырык, празаік, драматург Міхась Скрыпка. Не забылася і пра знакамітых крупчан, бо на Крупшчыне я жыву ўжо 46 гадоў, і яна стала для мяне роднай. Міхась Калачынскі, Васіль Зуёнак, Міхаіл Пацёмкін, Васіль Макарэвіч, Змітрок Марозаў – прозвішчы гэтых і іншых паэтаў, якіх узрасціла крупская зямля, таксама былі нагаданы ў маёй творчай рабоце.
Далей Валянціна Скваркоўская гаварыла аб тым, што, нягледзячы на маразы, шматлікія наведвальнікі запоўнілі выставачную прастору, на якой размясціліся экспазіцыі выдавецтваў з 32 краін Еўразіі і Амерыкі. Асаблівае ўражанне на яе аказаў беларускі павільён, дзе пад знакам Года малой радзімы было прадстаўлена шмат цікавых краязнаўчых і этнаграфічных выданняў.
– Арганізатарам удалося ператварыць плошчу выставы ў захапляльную і поўную сюрпрызаў інтэрактыўную прастору, на якой можна было не толькі набыць новыя выданні, але і ўбачыць шмат знакамітасцяў, – адзначыла Валянціна Іванаўна. – Эмоцыі, можна сказаць, зашкальвалі. Удзельнікамі літаратурнага конкурсу сталі больш 100 чалавек. Гэта прадстаўнікі розных прафесій і ўзростаў, не толькі беларускія, але і замежныя аўтары, якія маюць сувязь з нашай краінай. Маімі канкурэнтамі былі пісьменнікі, паэты, журналісты. Пераможцамі ж аказаліся толькі 15 удзельнікаў. Таму мне вельмі і вельмі дарагая атрыманая перамога – Дыплом ІІІ ступені.
