.jpg "Камбайнер Іван куркін і яго памочнік Дзяніс Кляшчонак")
Аб тым, што жніво-2015 мае свае асаблівасці – сёлета ўборку ўраджаю і падрыхтоўку палёў да сяўбы азімых неабходна правесці ў вельмі сціслыя тэрміны – добра ведаюць працаўнікі палёў адкрытага акцыянернага таварыства “Крупскі райаграсервіс”.Пераканаліся ў гэтым і мы, калі, пад’ехаўшы на жніўны палетак, які раскінуўся адразу за вёскай Лазоўка, убачылі адразу трактары, што пасля ўборкі саломы аралі глебу, а воддалі – збожжаўборачныя камбайны.
– Усе мы разумеем, што ўраджай сабраць трэба вельмі хутка, – гаварыла галоўны аграном гаспадаркі Ілона Ляпеха. – Разумеем таксама, што час на правядзенне ўборачнай фактычна скараціўся на трэць, і пры гэтым, як было сказана старшынёй аблвыканкама, нельга забываць, што паводле тэхналагічных патрабаванняў ужо да 20 жніўня неабходна пасеяць рапс і свірэпіцу, да 20 верасня – азімыя культуры. І нашы механізатары стараюцца. З самай раніцы прыходзяць на мехдвор, каб падрыхтаваць свае палявыя караблі да выхаду ў поле. Чакаючы пакуль знікне раса і ў зерня будзе неабходная вільготнасць, разам з памочнікамі правяраюць тэхніку, а затым накіроўваюцца ўбіраць спелую збажыну. Толькі за адзін нядзельны дзень, напрыклад, было абмалочана 153 гектары, намалочана амаль 470 тон збожжа пры сярэдняй ураджайнасці 30,6 цэнтнера з гектара.
На жніўныя палеткі таварыства мы накіраваліся ў панядзелак, 3 жніўня. Азімае жыта за Лазоўкай займае 135-гектарную плошчу. Убіраць яго пачалі напярэдадні, а ўжо да вечара панядзелка мяркуюць закончыць. Шчыруюць літаральна ўсе, але на гэты раз нам назвалі прозвішчы тых камбайнераў, якія ў сезон уборачных работ прыйшлі на дапамогу з іншых прадпрыемстваў і арганізацый раёна. Гэта, у прыватнасці, Пётр Кажухоўскі, Уладзімір Гергала, Іван Куркін. І, дарэчы, некаторыя з іх робяць гэта ўжо не адзін год. З адказнасцю адносяцца да сваёй работы таксама камбайнер Сяргей Максімаў, вадзіцелі, занятыя адвозкай збожжа на такі і элеватары, – Уладзімір Богдан, Юрый Кірэеў, Сяргей Гарбачоў.
.jpg "вадзіцель Сяргей ГАРБАЧОЎ")
– Вадзіцелем працую ўжо больш трыццаці гадоў, – уступіў у размову Сяргей Гарбачоў. – Даводзіцца перавозіць самыя розныя грузы, але заўсёды імкнуся своечасова выконваць усе заданні і даручэнні. Выходзіў пераможцам раённага спаборніцтва на перавозцы збожжа ад камбайнаў, прыходзіцца адвозіць яго і ў Барысаў на нарыхтоўчы пункт.
Не падводзяць і камбайнеры.
– На жніве ў райаграсервісе я першы год, – зазначыў Іван Куркін, асноўная работа якога – раённы аддзел унутраных спраў. – А дзесьці сезонаў сем працаваў у адкрытым акцыянерным таварыстве «МайскаеАгра». І памочнікам у мяне Дзяніс Кляшчонак, які працуе ў камунгасе, але таксама вырашыў аказаць дапамогу Крупскаму райаграсервісу. Вось так у адной звязцы і змагаемся, імкнучыся трымаць і якасць, і тэмпы ўборкі.
Да месца адзначыць, што на полі, дзе працуюць камбайны, – пажарная машына, ёсць вогнетушыцелі. Абеды дастаўляюцца на спецыяльна абсталяванай стэлажамі і паліцамі аўтамашыне «Газель». Гарачая ежа рыхтуецца ў мясцовай сталовай і механізатары задаволены ёю. Для эканоміі часу ў гэту гарачую пару камбайнеры з памочнікамі абедаюць па чарзе. Удзельнікі жніва забяспечваюцца харчаваннем двойчы на дзень.
І хаця хлеб лёгкім ніколі не бывае, галоўнае для аграрыяў Крупскага райаграсервісу – выкарыстоўваючы спрыяльныя надворныя ўмовы, якія якраз і прагназуюцца на бягучы тыдзень, як мага хутчэй управіцца са жнівом.
Фота Аляксандра БУДЗЬКО.
