У ААТ "МайскаеАгра" ўсе пытанні аховы працы пад кантролем

– Адразу хачу назваць нашых пастаянных работніц, занятых сушкай збожжа на ЗСК «Петкус». Гэта – Галіна Базюк, Тамара Гусарава і Юлія Гергала, – пачала размову загадчыца склада Наталля Мільнічэнка, якая на гэтай пасадзе, дарэчы, ужо 20 гадоў. – На «АВМ-069» працуюць Ігар Гара і Сяргей Палуда, а на польскай збожжасушылцы «М-819» – Пётр Рабчынскі і Станіслаў Лысакоўскі. Стараюцца ўсе – і тыя, хто заняты пастаянна, і тыя, хто прыходзяць на дапамогу падчас жніва. Толькі добрыя словы магу сказаць і ў адрас падлеткаў – Таццяны Ладоўскай, Дзіяны Комель і Карыны Каробка, якія ў летні час вырашылі падзаробіць. З імі заключаны працоўныя дагаворы, у аддзеле кадраў гаспадаркі ёсць пісьмовыя згоды бацькоў, іх заявы. Перш чым дзяўчаты прыступілі да работы, з імі быў праведзены інструктаж, прайшлі яны і медыцынскі агляд, ім выдадзены інвентар, і яны ў асноўным падмятаюць і пераварочваюць збожжа.

І тут у нашу размову ўключылася загадчыца тока Людміла Еўдакімава:

– Пытанням аховы працы мы ўдзяляем самую пільную ўвагу. Асабіста я праводзіла з непаўналетнімі пазапланавы інструктаж па ахове працы. А зусім нядаўна да нашага ведама даведзена, што ў цяперашнюю ўборачную ў адной з гаспадарак Уздзенскага раёна адбыліся два няшчасныя выпадкі. Правай рукі пазбавіўся трактарыст-машыніст, які не заглушыў рухавік камбайна і праводзіў праверку нацягвання транспарцёра нахільнай камеры. А ў другім выпадку, калі работнік у абедзенны час адпачываў у валку саломы, а яго калега, не заўважыўшы, зрабіў наезд, чалавек ад атрыманых траўм памёр. І прычына гэтых трагедый відавочна: халатнасць саміх жа пацярпелых і безадказныя адносіны да сваіх абавязкаў. У сваю чаргу, для прафілактыкі падобнага пра гэтыя няшчасныя выпадкі мы расказалі ўсім, хто ў нас працуе, а на сённяшні дзень гэта 20 чалавек. 

У пакоі на збожжатаку, дзе і вялася наша размова, аформлены куток па ахове працы і пажарнай бяспецы, адказнай за якую з’яўляецца загадчыца склада. Нам расказалі, што супрацоўнікі раённага аддзела па надзвычайных сітуацыях часта прыязджаюць на збожжаток з рэйдамі, у тым ліку і начнымі. У абавязковым парадку правяраецца супрацьпажарны стан збожжаўборачнай і збожжаперапрацоўчай тэхнікі, наяўнасць пярвічных сродкаў пажаратушэння. На стэндах змешчана разнастайная інфармацыя. Нельга не звярнуць увагі на маляўнічыя плакаты: «Урожаю – да! Травматизму – нет!», «Охрана труда при уборке урожая» і іншыя. 

– На ўсіх этапах уборачных работ – ад збожжаўборачнага камбайна ў полі да збожжасклада – нашы спецыялісты імкнуцца забяспечваць бяспеку іх вытворчасці ў адпаведнасці з патрабаваннямі, устаноўленымі нарматыўнымі прававымі актамі, – расказвала інжынер па ахове працы таварыства Людміла Чура. – Мы пастаянна сочым за захаваннем механізатарамі правіл тэхнічнай эксплуатацыі машын і механізмаў, за арганізацыяй бяспечнай перавозкі работнікаў да месц вытворчасці работ і назад. Усе забяспечаны спецадзеннем. Што датычыць эксплуатацыі і абслугоўвання збожжасушыльнага абсталявання, то ўсе работнікі маюць адпаведную кваліфікацыю, прайшлі інструктаж і праверку ведаў па пытаннях аховы працы. Словы ўдзячнасці за ўвагу да гэтых пытанняў хочацца сказаць кіраўніцтву гаспадаркі.

Уборка збожжавых і зернебабовых у ААТ «МайскаеАгра» практычна закончана, і цяпер асноўны клопат хлебаробаў – дапрацоўка збожжа на таках. А іх, збожжатакоў, у гаспадарцы тры – у Ігрушцы, Ротані і Майску. На сераду, 19 жніўня, калі мы наведвалі таварыства, намалот у цэлым складаў звыш 8 500 тон, з іх на ток у вёсцы Майск прыходзіцца 3 136 660 тон збожжа. «Прыход з поля» (менавіта так адзначаецца ў ведамасці), як бачым, салідны. Але тут упэўнены, што зладжана і арганізавана працуючы, усё будзе зроблена своечасова.