Многія адкрытыя акцыянерныя таварыствы пачыналі весці ворыва глебы адразу ж пасля ўборкі збожжавых, калі вызваляліся палі. І гэта, бясспрэчна, дало свой плён.Па-першае, актыўна праведзена ворыва глебы пад азімы рапс і свірэпіцу: з плана 5 тысяч гектараў на чацвер, 27 жніўня, узарана ўжо 5 036 гектараў, што складае 101%. Але тут варта зазначыць, што калі шэсць гаспадарак выканалі і нават перавыканалі планавае заданне, то ў ААТ «Халопенічы» з плана 750 гектараў ворыва праведзена на плошчы ў 514 гектараў..
Разам з ворывам глебы вядзецца і падрыхтоўка яе пад сяўбу азімага рапсу і свірэпіцы. У прыватнасці, з плана 5 тысяч гектараў падрыхтавана 4 тысячы 280 гектараў глебы, што складае 86%. Азімы рапс запланавана пасеяць на плошчы 4 тысячы гектараў. На прыведзеную дату ўсімі гаспадаркамі пасеяна 3 279 гектараў (82%). На 117% (план сяўбы 600 га) выканана заданне па сяўбе азімага рапсу механізатарамі ААТ «Крупскі райаграсервіс». У ААТ «Старасельскае» з плана 600 гектараў насенне азімага рапсу лягло ў глебу на 517-гектарнай плошчы, што складае 86%. На 80% выканана заданне і ў ААТ «МайскаеАгра», дзе гэта культура пасеяна на плошчы ў 477 гектараў.
Сяўбу свірэпіцы пачалі пакуль дзве гаспадаркі – ААТ «МайскаеАгра» (пасеяна 60 гектараў) і сельскагаспадарчы філіял «Шчаўры» ААТ «Здравушка-мілк» (пасеяна 29 гектараў). Увогуле ў раёне свірэпіцай будзе занята 1 000-гектарная плошча. Пасеяна ж яна толькі на 89 гектарах.
Пад сяўбу азімых збожжавых трэба ўзараць 12 тысяч 500 гектараў глебы. Фактычна ўзарана 2 888 гектараў, што складае 23%. Не прыступалі да гэтай работы механізатары сельгасфіліяла «Шчаўры» ААТ «Здравушка-мілк». У цэлым па раёне пад сяўбу гэтай культуры падрыхтавана 1 104-гектарная плошча (9%). Сеяць пшаніцу і трыцікале пачалі ўжо ў ААТ «Крупскі райаграсервіс». Насенне першай культуры лягло ў зямлю на плошчы 384 гектары, а другой – на 72 гектарах.
Час не чакае. І ўжо наступіла пара паклапаціцца пра ўраджай будучага года.
