Мы ўжо неаднаразова паведамлялі аб тым, што хлебаробы ААТ «Старасельскае» першымі ў раёне пачалі ўборку збожжавых і зернебабовых і першымі закончылі. Так было ў мінулым годзе, так надарылася і сёлета. І нашы карэспандэнты не пакідалі без увагі ўдзельнікаў жніва на працягу ўсіх дзён яго правядзення. У ліку лепшых працаўнікоў кіраўніцтва гаспадаркі заўсёды называла прозвішча камбайнера Сяргея Шарапава. Да месца адзначыць, што яшчэ на пачатку ўборачнай хлопец атрымаў падарунак ад райкама прафсаюза работнікаў аграпрамысловага комплексу. Затым яму як лідару раённага спаборніцтва сярод камбайнераў збожжаўборачных камбайнаў ва ўзросце да 31 года, якія намалацілі найбольшую колькасць тон збожжа ў перыяд уборачнай кампаніі бягучага года, было ўручана Падзячнае пісьмо старшыні раённага выканаўчага камітэта.
У адкрытым акцыянерным таварыстве Сяргей Шарапаў працуе толькі трэці год. Летась прымаў удзел ва ўборцы збожжа ўпершыню і сярод маладых камбайнераў пастаянна знаходзіўся ў лідарах раённага спаборніцтва. І сёлета, дарэчы, яго прозвішча не сыходзіла з раённай Дошкі гонару ўдзельнікаў працоўнага спаборніцтва на жніве.
Уборка збожжавых і зернебабовых у гаспадарцы скончылася. З камбайна Сяргей перасеў на трактар і цяпер шчыруе на зяблевым ворыве, клапоціцца аб падрыхтоўцы глебы да наступных вясенне-палявых работ. Хлопец разумее, што ворыва зябліва – адна з галоўных умоў поспеху, задзел для будучага ўраджаю.
