.jpg)
У гэтым годзе цёплыя зімовыя дні і ранняя вясна прымусілі земляробаў выбарачна весці палявыя работы з канца лютага. Раней звычайнага і ў нашым раёне пачаліся падкормка азімых зерневых, сенакосаў і пашы, шматгадовых траў, унясенне арганічных і мінеральных тукаў. Пры далейшым спрыяльным надвор’і хутка ў поле выйдуць і сеялкі.
Аднымі з першых у вясеннія клопаты ўключыліся земляробы ААТ «Крупскі райаграсервіс». Яшчэ ў лютым было падсеяна 172 гектары канюшыны, актыўна вядуцца падкормка і іншыя работы.
Разам з галоўным аграномам гаспадаркі Ілонай Ляпехай мы пабывалі на ўчастку ля малочнатаварнага комплексу «Плавучае», дзе вялося ўнясенне арганікі. Работы тут ужо заканчваліся. Здалёк была бачна арганізаваная праца механізатараў. Гэта, як і добра ўгноенае поле, радавала вока. А пагутарыўшы з механізатарамі, адчулі, што настроены яны аптымістычна.
– На сёння на ўнясенні арганікі пакуль занята адно звяно ў складзе механізатараў Міхаіла Малашчанкі і Васіля Худалея, якія працуюць на трактарах «МТЗ-3022» з прычэпамі «ПМФ-18», і Аляксандра Лісоўскага – на пагрузчыку, – тлумачыла Ілона Уладзіміраўна. – На гэтых 16 гектарах будзе праведзена перазалужэнне і створана многакампанентная паша для дойнага статка. Працуем з 6 гадзін раніцы і да абеду, бо пазней на поле пакуль нельга ўз’ехаць. Як толькі надвор’е паспрыяе, у работу па ўнясенні арганікі ўключацца і іншыя звенні. Дарэчы, гэтыя працаўнікі кожны год займаюцца і сяўбой яравых.
Як гаварыла далей галоўны аграном, на палях каля вёскі Лазоўка і на вытворчым участку «Касянічы» ідзе ўнясенне мінеральных угнаенняў. Гэтыя работы там праводзяць адпаведна механізатары Юрый Шыдлоўскі і Уладзімір Баравік.
– А сяўбу яравых збожжавых будзем пачынаць, калі глеба прагрэецца на 10 сантыметраў да 5 градусаў, – удакладніла аграном. – Але пры гэтым абавязкова трэба ўлічваць асаблівасць сёлетняга года – дэфіцыт у глебе вільгаці. А гэта не лепшым чынам паўплывае на стан пасеваў, а потым – на ўраджайнасць. Таму там, дзе вільгаці недастаткова, можна сеяць раней.
Усяго земляробам ААТ «Крупскі райаграсервіс» неабходна засеяць яравымі збожжавымі 1500 гектараў, 550 – кукурузай, 20 – гароднінай, 218 – аднагадовымі культурамі, 150 гектараў яравым рапсам. Але, пакуль сеялкі выйдуць у поле, неабходна прыкласці шмат намаганняў па правядзенні папярэдніх работ. Што і робяць працаўнікі гаспадаркі старанна і якасна.
