Называліся самыя розныя меркаванні: сярод беларусаў шмат людзей са светлымі валасамі; нашы продкі аддавалі перавагу беламу адзенню; белыя буслы, якіх дагэтуль нямала ў Беларусі, сталі яе сімвалам...
І вось кожная каманда атрымлівае маршрутныя лісты, на якіх змешчаны назвы тых аб’ектаў нашага горада, якія яны павінны наведаць. А гэта пяць станцый: «Старонкі гісторыі маёй малой радзімы» (Крупскі гісторыка-краязнаўчы музей), «Беларускі вянок» (СШ № 1 г. Крупкі), «Крыніца духоўнасці» (ЦДТ), «Бібліятэчны прыпынак» (раённая бібліятэка) і «Перакладны» (гарадскі парк).
Раённую гімназію прадстаўлялі тры каманды: «Нашчадкі», «Сузор’е надзей», «Беларусы»; СШ № 3 столькі ж – «Полымя», «Папараць-кветка» і «Крупчане»; СШ № 1 дзве – «Натхненне» і «Адрэналін».
Каманды павінны былі наведаць усе станцыі. На пляцоўцы ў музеі пасля размінкі прапаноўвалася пяць заданняў: трэба было напісаць прозвішчы выдатных асоб Крупшчыны; адказаць на пытанне, якая рака дала назву нашаму мястэчку, і назваць прозвішча аўтара гімна Крупшчыны; па фотаздымках назваць помнікі горада; разгадаць шараду «Пралеска» і адгадаць, што знаходзіцца ў скрынцы.
Столькі ж заданняў трэба было выканаць і падчас наведвання прыпынку «Бібліятэка». Гэта слоўнікавая гульня – зрабіць пераклад з рускай мовы на беларускую; уставіць слова ў прыказку; назваць сапраўднае прозвішча Янкі Купалы; скласці з разрозненых слоў прыказку і прачытаць скорагаворку. Пасля праведзенага бліц-апытання «Любімае слова на роднай мове» ля кніжнай выставы рабілася агульнае фота ўдзельнікаў і супрацоўнікаў бібліятэкі.
У Цэнтры дзіцячай творчасці камандам-удзельнікам прапаноўвалася гульня-лабірынт «Крыніца духоўнасці». Тут высвятлялася веданне народнага календара і побытавых прыкмет, звязаных з каляндарнымі датамі. Для гульні было пастаўлена кола ў выглядзе сонца, падзеленае на 12 сектараў (3 сінія – зімовыя святы, 3 зялёныя – веснавыя, 3 чырвоныя – летнія і 3 жоўтыя – восеньскія). І каманды павінны былі назваць святы, якія адпавядалі кожнай пары года.
Вялікую цікавасць выклікаў прыпынак «Перакладны», які праходзіў у гарадскім парку. Гледзячы на каляровы малюнак, трэба было назваць прадмет альбо асобу на рускай мове і зрабіць пераклад на беларускую.
Шмат новага пазналі школьнікі, наведаўшы станцыю «Беларускі вянок», якая размяшчалася ў СШ № 1. Пасля заданняў яны называлі прозвішчы мастацкага кіраўніка ансамбля «Песняры» Уладзіміра Мулявіна, аўтара паланэза «Развітанне з радзімай» Міхаіла Агінскага, удзельніка конкурсу песні «Еўрабачанне-2006» Дзмітрыя Калдуна і інш.
І вось гульня закончана, і кампетэнтнае журы называе яе пераможцаў. Дыплом ІІІ ступені заваявала каманда «Полымя» СШ № 3 горада, Дыплом ІІ ступені – каманда «Нашчадкі» Крупскай раённай гімназіі і Дыплом І ступені – каманда «Натхненне» СШ № 1 горада.
